Op de Boonte Aovendj van VV De Rogstaekers in ‘t Munttheater és maondjig 12 jannewarie 2016 doeër de Samenwerkende Limburgse Vastelaovesverenigingen (SLV) de “Orde van de Zilveren Buut” doeër Prizzedént Raymond Vlecken uutgereiktj aan Ronald en Carien Moonen.
Ronald en Carien zeen geîn onbekindje in 't vastelaovendjwêrreldje, zieëker as 't gieët um vastelaovendjlidjes. Neet alleîn in Wieërt met 't WVLF (Wieërter Vastelaovendj Lidjesfestival) mer ouch met 't LVK. (Limburgs Vastelaovendlidjes Konkoer)
Al vanaaf 1989 staon Ronald en Carien same op de buun, in det jaor krieëge ze ouch eur ieërste platencontract beej Johnny Hoes en vanaaf begîn ‘90 zeen ze actief mét vastelaovendmeziek. Dae vastelaovendjmeziek hebbe ze neet mieër losgelaote, woeëbeej ze zich ouch al jaore in zette um de Wieërter artieste te begelei-je nao 'n hoeëger niveau.
Ze gaeve ongerstuuëning en advies in de vuuërbereiding en stelle eure opnamestudio ter beschikking, Carien es daobeej dan 'n gewêldjige gastvraw.
Carien hieët daonaeve ‘n fantastisch organisatietalênt en hieët zich 'n groeët aantal jaore ingezatte vör de Wichterfieëstmiddig van de Rogstaekers. Bezocht heejvör zêlfs de basisschoeële um de wichter te enthousiasmieëre mej te gaon doon aan de wichtervastelaovendj.
Ouch in 't 8 x 11 jubileumspektakel "De Legende" woore 't Ronald en Carien di-j heej ’n groeët aandael in haaje. Ronald spuuëldje de hoeëfdrol van Börgemeister en Carien as kefeevraw. Verder gaon ze doeër 't laeve as professionele artieste met 't Duo Difference, woeëbeej ze in meinig Limburgse zalen optreî-jes verzörge.
Wieërt woor naoteurlik ontzettendj gruuëts wi-jdet ze op ’t LVK van 2010 de 2e plaats behaaldje met "Limburg laeftj met de Vastelaovendj". Boete dit alles zeen Ronald en Carien neet te beroerdj um de artiestenkérresjel met ’t Boorebâl same te stelle en de presentatie op zich te neme.
Stadsvastelaovendjvereiniging De Rogstaekers zeen van meining det met boeëvestaondje de Zilveren Buut vör ’t jaor 2016 op de zjuuste plaats és terecht gekaome.
