Aafscheidstoernee Vorst Jan

18-11-2016

Leêf Rogstaekerinnekes en Rogstaekers,

Op 11 november jl. és miêne aafscheidstoernee gestartj!

Tiêdes ’t now evenemênt “Vorst oppe Troeën” móch ich vör ’t ieërst (en drek ouch vör ’t lést) mien troeënrieëje haoje. Dao heb ich ‘ne hoûp serieus noets en schaele zeiver gebrachtj, êrges ângers heej oppe site kujjae det nog ’s op eûr gemaak doeërlaeze.

Eîn noviteit wil ich d’r gaer uutlichte: “Ich bin ‘ne Rogstaeker®”.
‘t Uutspraeke alleîn hieët iets van stélligheid in zich. En ouch gruuëts dejjae uch zoeë neûmtj. ‘ne Rogstaeker® hieët ‘t vastelaovendjhért oppe zjuuste plaats, drûgtj aane instândhaojing vanne vastelaovendjcultuur beej en drûgtj ‘t zelfs ‘n bitje uut doeër ‘n schoeën speldje. Rogstaeker zeejjae allemaol, mèr zétdje kracht beej doeër uch in te schriêve as Rogstaeker®. ‘n Bitje wi-j beej de börgelikke stând op ‘t Gemeîndjehoês. Wi-j det wiêter allemaol inein zitj, wûrtj uch heej oppe site allemaol uutgelagdj.

Wi-j gezagdj: miene aafscheidstoernee és gestartj. Nog eine kieër de Preens uutroôpe en nog eine kieër de Jeugdpreens aan uch vuuërstélle. Nog eîn reeks Boonte Aovendje, nog eîne kieër Boorebâl. Vör de léste kieër boeëve oppe Raod van Ellufwage en mien léste rundje naeve de boeteni-jje.
Ich kân uch verzieëkere: Dao heb ich nog zjuust zoeëvöl zin in as 12 jaor gelieëje!

Op vastelaovendjdieënsdigmiddig ésj dan vör mich vörbeej. Ich hoeëp van hérte dejjae d’r dan allemaol beejzeêtj as ich mien vaere inleêver. Daonao doon ich gaer weer ‘n ânger pékske aan want zeêtj gerösj, ich hoôf mich straks niks te vervaele.
Inne coulisse stieët miêne opvolger, Stan Ockers, te tréppele van ongeduîldj. D’rvan oeëvertuûgdj det hae dieës gewêldjige funksie op zien eige vuuërtreffelikke meneêr invölling zâl gaeve wîns uch ‘m daobeej völ succes mer boeëve’n’âl hieël völ plezeer!

Ouch völ plezeer wîns ich úch allemaol. Ederein dae de Wieërter vastelaovendj ’n wêrm hért tówdraagtj, ederein dae de Wieërter vastelaovendj veûltj, preûftj en belaeftj. Ederein dae de Wieërter vastelaovendj zoeë schoeën maaktj. Bedânktj vör di-j prachtige jaore vôl lôl en plezeer, knouwel en schaele zeiver, creativiteit en schoeëne meziek.

Wi-j ich in 1989 al zag: Völ plezeer op ’n schoeën meneêr!

Laeve de Rog, vivat oeës Wieërt!

Vorst Jan

handtaekening-vorst-jan