Vastelaovendjlidje 2018: Kiek waat ’n fieëst

06-01-2018

 

 

 

Hejjae uch as meziekleefhebber of
as vastelaovendjveerder
de léste daag ouch neet aafgevaogdj:
keumtj d’r dit jaor gein
vastelaovendjlidje!
Jaowaal, dieës traditie
kinne vae as
Stadsvastelaovendjvereîniging
de Rogstaekers neet aan
os vörbeej laote gaon.

2018-01-06DeLesteDrej600x400

De vastelaovendjprogrammieëring -nowwe Vorst en mieër-
leet effe gein lidjesfestival tow, mer desondânks és d’r achter de schêrme toch op ‘n zieër professionieële meneer met jurering en zoeë ‘ne vastelaovendjschlager uutgekoeëze. Umdet d’r ouch mieër tiêd waas um ‘n lidje uut te zeuke és d’r metein bepaaldj um dit ouch zoeë professionieël meugelik te prizzentieëre. Gae kintj ‘t lidje namelik beluustere op Spotify doeër op de platehoes klikke.

D’n titel van ‘t winnende lidje és: “Kiek waat ’n fieëst”. ‘t És geschriêve doeër Erik Fikken, met muziek van Joerik van Dooren en uutgeveurdj doeër: De Lèste Dre-j.
‘t Lidje zal tiêdes alle Rogstaekers aktiviteite ten gehuuëre waere gebrachtj.