In ’t Munttheater és de vreeje verkoup vör kaartjes in ’t nowwe sezoen van start gegânge. Neteurlik zeen d’r ouch kaartjes te kriêge vör de Boonte Aovendje en de Boonte Femiêliemiddige van 2019
Zoeë löst ich d’r nog e paar
Det és de titel vanne Boonte Aovendj en Boonte Femiêliemiddig 2019. Beej de Boonte Aovendj gieët ‘t um de humor en det zeeje aanne maffe typekes in soms vrieëmdje situaties. Herinner djae uch van aafgeloupe kieër nog de sketch mét deej 2 vrölli-j oppe fiets? Gae huuërtj ’t aanne stêrke tekste enne zângk. En woeë det oeëver gieët? Nêrges oeëver en asj wul êrges oeëver gieët dan oeëver de loompigheid van ‘ne gemiddeldje Wieërtenaar.
Wildje op zaoterdig 2, zoondig 3 of zaoterdig 9 fibberwarie 2019 de Boonte Aovendj bezeuke, dan mojje wachte dejje van os in oktoeëber de vuuërrizzervieëringskaart ontvangtj. Op dieës aovendje kriegdjae van os e plaetske. As dejje echter kaarte besteltj op eîn vanne aovendj uut ’t ri-jke heej oonger via ’t Munttheater dan kujje eur eige plaats uutkeeze. Zitj daorum altiêd good en wachtj neet mét bestelle as dejje det toch al van plan zeetj.
Kaarte vör de Boonte Aovendj kujje heej noow al vör de volgendje data bestelle:
- Vriêdig 1 fibberwarie
- Maondjig 4 fibberwarie
- Dieënsdig 5 fibberwarie
- Goonsdig 6 fibberwarie
- Donderdig 7 fibberwarie
- Vriêdig 8 fibberwarie
De Boonte Femiêliemiddig és ’ne aanraojer vör eder gezin det zien wichter ‘vastelaovendj veêre’ mej wiltj gaeve. ’t Schoeënste és ’t plezeer det alle aojers of opa’s en oma’s of oeëms en tântes aan eur wichter belaeve. Di-j hebbe namelik de groeëtste lôl mét de loompe types oppe buun en kaake vanzelf enthousiast mej as d’r um weurtj gevraogdj. Mét ’n oor theater en daonao twieë eurkes hosse inne foyer hebbe eur wichter de piêp lieëg en gae werschiênlik ouch, mèr gegarandieërdj wul ’ne topmiddig! Gae kuntj noow ouch kaarte vör dieës vuuërstellinge bestelle en dus eur eige plaatse uutkeêze:
