Zoondig 4 november és 't nummer 'Vleegmesjien' van Nick van Ham gekoeëze tot 't Wieërter Vastelaovenjlidje vör 2019. Det gebuuërdje tiedes de ieërste edite van 't WVLF in Theatercafé De Huiskamer.
Van 't nummer op tekst van Nick en op muziek van Mark Fonteijn weurtj 'n opname gemaaktj, di-j straks kân waere gedownloadj of gestreamdj en d'r weurtj ouch 'n arrangemênt vör hermeniekes van gemaaktj. De Fried van Dooren Wisseltreoffe woeërd aan Nick van Ham uutgereiktj door Carla van Dooren, dochter van naamgaever Fried, dae zich jaore hieët ingezatte vör de instândhoujing van de Wieërter vastelaovendjmuziek en talloze beginnendje muzikânte op wieëg hieët gehôlpe beej 't laeze en spuuële van de noeëdige Wieërter vastelaovendjlidjes.
