Zoek
Sluit dit zoekvak.
Zoek
Sluit dit zoekvak.

Plekke, plekke en nog ’s plekke beej de Tupkes

26-01-2019

Dieënsdig 22 jannewarie haaje de wichter uut de groepe 5 t/m 8 van Basisschoeël St. Joeëzef uut de Hej waal ’n hieël bezûndjer crea-les. ’n Aantal lede van Vastelaovendjvereîniging De Tupkes haaj ‘ne snipperdaag genoeëme en de wichter uutgenuuëdj um mej te kaome hêlpe met ’t bawwe aan eure wage, woeëdet ze mej gaon trekke in de optocht in de Hej, mer ouch in de groeëte optocht inne stad.

De wichter krieëge ieërst op ’n klein schets te zeen, wi-j ’t  d’r uuteindelik uut mot kaome zeen en ginge toen volop aane slaag met de verfbörstel en met plekke.

Hieël werschiênlik hebbe d’r saoves de noeëdige wasmachines motte drejje um oeëverâl de (oplosbaar) verf uut te haale, met det maakdje de lôl d’r neet minder um.

Oeëver dit prachtige initiatief, woeëmej de Tupkes de wichter mieër wille betrekke beej de vastelaovendj en waat dao aan vuuëraaf gieët, kujje laeze in De Rogstèker, de vastelaovendjgezét van de Rogstaekers, di-j tösse 4 en 10 fibberwarie (waek 6) uutkeumtj.