Aafscheid neme deut pien en as ’t nao ’t îndj gieët, kaome de emoties nao boeëve en deêne de waterlanders zich aan. Det huuërtj d’r beej. Vreugde mét de kinteîkene van verdreet én ’t verdreet zelf. ’t Twieëslachtige vanne vastelaovendj gevânge in ’n traon. D’r weurtj nog ’n lèste kieësplènkske uitgereiktj aan Nick van Ham, zoeëdet dae mét ’n gerösj hert in zien vleegmesjien kan stappe. Effe same ‘ne polonaise kân nog waal. ‘ne Aod-Preens verschuûltj zich achter ziene microfoon en hieët meute mét unne brok in zien kael, as Moeërepetazie eindigtj met zien Vastelaovendlidje van vuuërig jaor.
Âmper ’n oor wieter ésj vörbeej. Sanne zingtj: Vae zeen as Rogstaekers geboeëre. De klok oppe kêrktoeëre wiesj kwart vör nuuëge aan en de klokke beginne te lowwe, zoeëdet hieël Wieërt wètj: ZDH Preens Frank II en Jeugdpreens Stan I zeen neet mieër. De twieë vuuërgangers in de Wieërter vastelaovendj van 2019 gaon noow weer doeër ’t laeve as de 2 Van D’s: Frank van Dooren en Stan van Dijk. Eur mötse, al dan neet ingeliêsj, zölle ’n schoeën plaetske kriêge en de twieë nog dék herinnere aan eîn van de schoeënste periodes uut eur bestaon. Naodet ’t Roggebieëst de fik woeër ingegânge en de Preensemedalies woeëre ingeleverdj ginge de ex-preense, naogekieëke doeër hóngerte minse, mét de ladderwage vanne brandweer de locht in en in rouk op: ten teîken dét alles vergângkelik és, ouch ’t schoeënste fieëst van ’t jaor.
Laeve de Rog, vivat oeës Wieërt.
(tekst en foto’s: Jan Lormans)
