Nao ‘t oeëverweldigendje succes van ‘t veerdaagse evenemênt “Fieëst oppe Mêrrentj” tiêdus de vastelaovendj van 2019 teîkentj Stadsvastelaovendjvereîniging de Rogstaekers in 2020 oppernoets vör dieës organisatie. Doêzendje vastelaovendjveerders wiste vuuërig jaor eure wieëg nao de Mêrrentj in Wieërt te vînge en daorum kriegtj ‘t festijn dit sezoen ‘n vervolg.
Traditiegetraw wurtj de vastelaovendj op zaoterdig 22 fibberwarie ingeloêdj met ‘n sfeervol dialectmès in de daekenale Sint Martinuskêrk. Aansloêtendj börsj ‘t fieëst los op de oeëverdekdje Mêrrentj. ‘t Programma zal op dieëze aovendj bestaon uut livebands mét as hoeëgtepûnt op völ verzeuk opnow ‘n optraeje van Plat Wieërs. Op zoondig wurtj de priêsuutreiking vanne groeëte Rogstaekersoptocht aafgewisseldj mét ‘n artiesteprogramma mét oonger mieër de Toddezèk, Christel & Quinn en Guido Frissen. Op maondjig stieët de jeugd centraal tiêdus de priêsuutreiking vanne Wichteroptocht mét aansloêtendj ‘ne hosmiddig. Vastelaovendjdieënsdig vingtj ‘t Lindeboom Fieëst oppe Mêrrentj plaats met ‘n aantal Limburgse artieste van topniveau, woeë-oonger Beppie Kraft, Bjorn en Mieke en Marleen Rutten.
Op dit memênt wurtj d’r haard gewêrktj, ongerstuuëndj doeër Kefee de Gruyter en de SooS, aan de vuurbereidinge en de wieter invölling van ‘t programma. Vae haoje uch oppe huuëgdje via dieës website en de social media van de Rogstaekers.
