UPDATE De Schoeënste Etelaasj: En de winnaars zeen…

Dit jaor és vör de ieërste kieër de wedstriêd "De Schoeënste Etelaasj!" gehaoje, 'n samewêrking tösse VV de Rogstaekers, BIZ-O en Centrummanagement Weert um de straote in de aanluip nao de Vastelaovendj een gezelliger aanblik te gaeve. Messchien nog 'n bitje aarzelendj begîn, mer de reacties wiêze d'r noow al op, det d'r volgendj jaor waal 'n vervolg mót kaome.

De winkeliers zee neteurlik hertstikke benoeëdj, weem beej hun de schoeën priêze hieët gewonne.

De jury o.l.v. Carin Rosbergen hieët beraodslaagdj en in heur îndjoeërdeîl de stumme van 't pebliek vör 50% mej laote telle. De winnaars beej 't publiek kriêge de kaomendje waek  apaart bericht, mer in dieëze video maaktj Carin de motivatie én de uutslaag beej de winkeliers bekindj.

(Alles oeëver de wedstriêd kujje nog 's naolaeze in dit ieërder verschieëne bericht)

Juryvuuërzitter Carin Rosbergen maaktj de motivatie en de uutslaag bekindj van "De Schoeënste Etelaasj!"

Ouch de winnaars beej 't publiek zeen intösse bekindj.
Dieës minse hebbe alledrej recht op 'n jaorabonnement op "Ich bin 'ne Rogstaeker®" met det schoeën beejbehuuërendje speldje. En wieter kriêge ze ouch nog wat 'Köpkes' (11, 8 en 5), woeëmej ze mét di-j daag op völ plaatse 'n draenkske kinne koupe.

Weem zeen de gelökkige?

1. 1. Karin Moonen
   2. Patrick Schepers
   3. Dalou van den Bosch

Dieës 3 winnaars hebbe eure priês zaoterdig 22 fibberwarie gekrieëge uut hang vanne Preense, geliêk mét de priêsuutreiking beej de winkeliers inne zaak:

1. 1. Eric Mertens Optiek, Maasstraot
   2. Kookings, Langstraot
   3. Esperance, Hoeëgstraot

De winnendje wînkeliers van de wedstriêd De Schoeënste Etelaasj waerdje bezochtj doeër oeës Preense Tim I en Rens I en krieëge behâlve eure priês innegang ouch 'n óngerschei-jing uutgereiktj. De publiekswinnaars krieëge 't Rogstaekers®-pinke opgespeldj en ouch nog waat consumptie-köpkes inne hang gedowdj.