Vastelaovendj 2020 és d'r eine dae hieël wat minse nog lang zal huuëge. Organisatorisch hieët dit sezoen nogal wat extra wêrk mét zich mejgebrachtj. Zoeë moste nao 't wègkvalle van de vorst de noeëdige take waere herverdeîldj. Det ging gelökkig vreej soepel, en ouch de vuuërstellinge in 't Munttheater verliêpe wi-j altiêd: good, drök en gezellig mét as hoeëgtepûnt de uutrooping van (wi-j later blieëk) twieë grandioze Preense.
Mét Boorebâl most d'r vanwieëge storm Ciara waere uutgewieëke nao 't theater. Nauweliks 'n waek later kos de programmieëring onverângerdj doeërgângk vînge, mer tösse installatie in 't stadhoês en de receptie in de Poort van Limburg ging storm Dennis de fieëstgengers al lastig valle. Och, 'n bitje raengel, dao gaoje neet doeëd van, waerdje d'r toen nog gedachtj. Mer de rest van de waek daonao woeërt 't waer d'r neet baeter op en woeë völ minse en vuuërâl de optochtdeîlnemers bang vör ware, gebuuërdje: de optocht waerdje aafgelasj. 'n Meujlik besloêt, mer raekening haojendj mét de veiligheid vör edereîn 't einig juuste besloët.
En waat d'r dan gebuuërtj, és mét gein pen te beschriêve. Want ouch 't vör de zaoterdig en zoondig geplandje spektakel oppe Mêrrentj mot hâls oeëver kop verhoêze nao de Poort van Limburg. Mét mân en macht wurtj d'r gewêrktj um van 'ne kale zaal 'n fieëstelikke ontmoetingsplaats te make. De brawwer gieët aane slaag en d'r wurtj 'n wêrkschema vör 't barpersonieël in mekaar gedrejdj. Völ aod-preense, senaatslede, al dan neet vergezeldj van de vraw trekke 'n wit T-shirtje aan met oppe rög 't woeërd "Persenieël". Umdet dit nog neet genog és moge alle Rogstaekers, di-j op det memênt gemisj kunne waere, eure jacquet verruuële mét 'n spijkerbóks en 'n truitje. Täötebelle sprînge ouch beej, net as god weît wi-jvöl vreejwilligers.
As nao de Vastelaovendjmés De Bènt en Plat Wieërs de zaal plat spuuële, és edereîn de ellendje vör efkes vergaete.
Mer dan keumtj toch de zoondig, woeë noow 'n hieël groeët gaat veltj: geine optocht!
De gebroeders Jongen organizieëre spontaan 'ne alternatieve optocht, woeë zoeë 'n 250 minse aan mejdoon. Ouch vör Preens Tim I wurtj 't 'n rondje stoeploupe langs de singels, woeë normaal di-j prachtige wages trekke. Di-j staon noow opgesteldj in de aoj hal van Smeets, woeë de boel és umgedrejdj en hongerte minse langs de wages trekke. En in de Poort staon wieër 'ne houp minse klaor (woeëvan völ dezelfdje vanne zaoterdig) um pakweg 1.750 vastelaovendjgekke toch 'n plezeerige daag te gunne.
Oppe maondjig kân de Wichteroptocht gelökkig doeërgaon, mer ouch heej 'n aangepaszje route mét de priêsuutreiking en de hosmiddig inne Poort. En gae snaptj 't al: ouch dao hejje wieër persenieël vör noeëdig.
Um 'n oor of veer kaome inne raengel 'n klein 500 minse beej-eîn oppe Oelemêrrentj. Want dao gieët dan de Wieërter 11 van start. Van 't begîn tot aan de kroege beej de Bûltj van Verheggen wurtj ederein zeikenaat, 't gutj d'r uut. Mer ouch heej bliëke de minse neet van sókker te zeen en mét redelik good waer mét aaf en tow nog wat dröppelkes trektj de stoet wieter. Petje aaf vör edereîn dae 't tot îndj hieët vôl gehaoje: en det woore de mieëste!
De dieënsdig begintj mét 'n lekker schieënendj zönke en terwiêl de kepélle doeër de straote van kefee nao kefee trekke, völtj de Mêrrentj (jao eindelik) zich mét minse, di-j noow toch waal 's echt wille gaon geneete van 't Lindeboom Fieëst oppe Mêrrentj. Artieste kaome en gaon; 't és 'ne tsunami aan muziek en vuuër dejje d'r êrg in hètj és Beppie Kraft al mét zien towgift bieëzig. Dan gieët 't rap: 't Roggebieëst wurtj in de fik gestoeëke, de sluuëtels kaome wieër in hang van Geert, de vaere verdwiêne en Wieërt és twieë Preense êrmer. Effe later kieke Tim Jacobs en Rens Damhuis op 'n huuëgdje van 34 maeter op os nieër, zwejje nog 'n kieër en weg zeen ze: 't Woeëre drej daag um neet gaw mieër te vergaete..
En mogdje soms nog altiêd dînke, det d'r vör Vastelaovendj in Wieërt geîn Rogstaekers noeëdig zeen, dan haaj ich mich 't schriêve van dit stökske kunne bespare, want dan haaj heej gein letter gestânge:
Laeve de Rog, Vivat oeës Wieërt!
Jan Lormans
