‘t Veûr mót bliêve börre:
Waal Stadspreense in Wieërt, echter gein traditionieël activiteite
Noow Corona de wéreldj in z’n greep hieët, és de Vastelaovendj wi-j vae gewindj zeen um dae te veêre zieëker neet realistisch. Daorum hieët ouch Stadsvastelaovendjvereiniging De Rogstaekers met pien in ‘t hért besloeëte det in 2021 de Boonte Aovendje, de Boonte Femiêliemiddige, ‘t Boorebâl, de Groeëte Rogstaekersoptocht, de Wichteroptocht en ‘t Fieëst oppe Mêrrentj néét doeër gaon.
Gezóndheid, veiligheid en belaeving
Aane hând van alle beschikbaar informâsie en in naw oeëverlégk met de Gemeindje Wieërt, Vastelaovendsjbónd SLV en verschillendje vereiniginge kûmtj Stadsvastelaovendjvereiniging de Rogstaekers vör ‘t kaomendje vastelaovendjsezoen met alternatieve woeëbeej gezóndheid, veiligheid en belaeving centraal staon. De ontwikkelinge op ‘t gebeêd van Coronamaotregele waere daobeej nawléttendj inne gate gehaoje en woeë noeëdig beejgestéldj.
Uutroôping Rogstaekerspreense
Vastelaovendj és ‘n fieëst vôl tradisies en plezeer. En ‘t és boeëvenâl ‘n fieëst det laeftj inne hérte vanne minse. De Rogstaekers vînge ‘t belángriêk dét ‘t vastelaovendjveûr bliêftj börre, al zâl ’t dit jaor messchien slechs ‘n waakvlémke zeen. En zjuust daorum waere d’r ouch kaomendj sezoen twieë Rogstaekerpreense uutgeroôpe.
Op zaoterdig 16 jannewarie 2021 wûrtj de 77e Stadspreens van Wieërt uutgeroôpe en op zóndig 17 jannewarie 2021 és ‘t de 70e Jeugdpreens van Wieërt dae zien opwachting maaktj. Zeûj zölle kluuër gaon gaeve aan ‘n onvuuërspelbaar vastelaovendjsezoen, dét uniek és en vast en zieëker ‘n onuutwisbare indrök achterlieëtj beej ‘t pebliek.
Knouwel en plezeer, op ’n ânger meneer
As de umstandighede ‘t tówlaote zâl de binnestad ‘n sfeervol aanklei-jing kriêge en de “Knouwelexpress” de Vastelaovendj nao de minse tów brînge. De tentoeënstélling “Vastelaovendj és sprînglaevendj” pötj uut ‘t riêke archief van Stadsvastelaovendjvereiniging de Rogstaekers en verschillendje mediakanale waere ingezatte vör ‘n (interactief) ‘vastelaovendjbelaeving’. D’r wûrtj momentieël haard gewêrktj aane uutwêrking van ‘n alternatief program, woeë-oeëver ’t pebliek de kaomendje maondje wiêter geïnformieërdj zâl waere. Kaomendj vastelaovendjsezoen géldj in Wieërt: “Knouwel en plezeer, op ’n ânger meneer”.
