2020-11-10NellekeBongers

 

Vanaaf de 11e vanne 11e 2020 és ’t fónkelnow Ich bin ‘ne Rogstaeker® pinke verkriêgbaar vör ingeschriêve Rogstaekers®. Edere Wieërtenaar és as Rogstaeker geboeëre of ‘t gewoeëre, mer ingeschriêve Rogstaekers® hebbe ’n streepke vuuër. Ze drage beej aane instândhaojing vanne Wieërter vastelaovendjcultuur en det drage ze uut doeër ’t exclusieve draagspeltje. Eder jaor zörgtj ‘ne ângere creatieve Wieërtenaar vör ’t ontwêrp van dit unieke pinke. ’t Ontwêrp vör ’t sezoen 2020-2021 és gemaaktj doeër Nelleke Bongers. Nelleke és lid van V.V. Vétnel en in ‘t daagliks laeve wêrkzaam beej 'n museum in 't zuuëde van oeës schoeën Limburg.

’t Pinke van 2021 bestieët uut ’n prachtig vastelaovendjgezicht. Nelleke: “As ich dînk aan de uutspraok ‘Ich bin ‘ne Rogstaeker’, dan dînk ich aan alle schoeën uutgedozje dames en hieëre met vastelaovendj. Ederein deût z’n bêst um de gekste en schoeënste creaties uut de kast te hale. De inspirâsie vör ’t pinke kûmtj dan ouch voeërt uut al dieës vastelaovendjgezichte. Ich heb dit gecombinieërdj met ’t stadswaope van oeës eige Wieërt en zoeë bin ich tot ’t ontwêrp van dit pinke gekaome. Ich hoeëp dejje d'r wat van eur eige in herkintj en det eur leefdje vör de vastelaovendj ouch dit jaor wieër ‘n bitje wûrtj aangewakkerdj!”

Ingeschriêve Rogstaekers® ontvânge ‘ne persuuënlike mail woeëmej ze eur pinke aaf kinne hale beej WarenHuis-conceptstore inne Bieëkstraot. Heej ésj ouch muuëgelik um ich in te schriêve as Rogstaeker®. Gae kriegtj ’t pinke dan drek met.

Of schriêftj uch heej meteîn in as "Ich bin 'ne Rogstaeker®"

LET OP: Umdet 't Warenhuis vanwieëge de lockdown tiêdelik gesloeëte és kujje, tot de wînkels wieër oeëpe gaon, terecht beej Schoonmakeri-j Grosfeld, Langstraot 54.


 

Inne video steltj Kanseleer Jasper uch vuuër aan Nelleke Bongers, de ontwêrpster van 't pinke
"Ich bin 'ne Rogstaeker®" vör 2021. Nelleke lutj uch 't pinke zeen en guftj tekst en uutlégk oeëver 't ontwêrp.