Op maondjig 15 fibberwarie bestieëdtj ‘t programma Kruispunt van KRO-NCRV uutgebrèdj aandacht aanne vastelaovendj. Oonger de titel ‘We vieren altijd Carnaval!’ wurtj stilgestânge beej vastelaovendj in coronatiêd. Ieëre-Vorst Ton en Kanseleer Jasper van de Rogstaekers kaome aan ‘t woeërd oeëver de maatschappelikke beteîkenis van vastelaovendj. Neet in eur schoeënste pekske roondhosse in ‘n aafgelaaje kroeg. Gein nachte doeërwêrke aan di-j groeëte wages vör de optocht. Vastelaovendj wurtj ângers dit jaor.
‘t Laeve van historicus Rob van de Laar stieët complieët in ‘t teîken van Carnaval: “Ik voel langzamerhand het opkomend gemis, nu het dichterbij komt. Want voor mij zijn het toch heilige dagen, waarop ik absoluut erbij moet zijn.”
Hae verklaortj de enorme sociale beteîkenis van ‘t fieëst det volges hem terecht Cultureel Erfgood és.
Vastelaovendj, van aodsher geveêrdj in katholieke streêke, és ‘t léste memênt um rejaal te aete en te drînke vuuëralieër de Vastetiêd begintj. Det vaste zitj d’r dék neet mieër in. Mer nog altiêd és ‘t e fieëst woeëbeej edereîn geliêk és en woeëbeej de minse uutgelaote aafscheid neme van ‘t aafgeloupe jaor. Um daonao wieër mét ’n schoeën lej te kunne beginne.
Mer wi-j mót det dit jaor, noow alle evenemênte zeen aafgelasj vanwieëge Covid‑19? Allein de Twieëde Werreldj-oeërlog, de Watersnoeëd van 1953 en de Golfoeërlog wore ieërder rieëje um dit volksfieëst oeëver te slaon. Mer ‘t veur van Carnaval 2021 és zieëker neet uutgegânge. Kruispunt volgtj ‘n aantal opmerkelikke initiatieve van minse di-j zich neet uut ‘t vêldj laote slaon.
In Wieërt wurtj ‘t vastelaovendjveur letterlik doeërgegaeve in de vorm van ‘ne fakkel. De gloed en gedriêveheid woeëmej ângers bêrge waere verzatte vör praalwages en dörpsfieëste zétte de minse noow in vör ‘n alternatief en corona-proof fieëst. D’r blieftj behoefte aan Carnaval. Aod-vorst Ton Peeters van de Rogstaekers uut Wieërt verwoeërdtj ‘t schoeën: “De stress en de zörg van ‘t dagelikse laeve, di-j veuldje mét Vastelaovendj wegstroume. Det hieët e geveul vör minse, det hebbe ze écht noeëdig. ‘t És ‘ne mix van hieël völ dînge, di-j vör minse baeter zeen as waat vör middesien dan ouch.”
‘Kruispunt’ wurtj uutgezonde op maondjig 15 fibberwarie um 22:50 oor op NPO2.
