Acteur Huub Stapel (Tegelen, 1954) ontvângtj dit jaor de Orde van de Gulden Humor. Dieës óngerscheiding wurtj sinds 1962 doeër de Samewirkende Limburgse Vastelaovesvereniginge (SLV) uutgereiktj aan persoeëne di-j zich bezûndjer verdeênstelik hebbe gemaaktj vör de bevordering van de laevesbli-jheid, de humor of de vastelaovendj. Stapel vólgtj Thijs Brand op. De beerbrawwer kreêg de óngerscheiding in 2019 uutgereiktj.
Limburger Huub Stapel woeërt bekindj doeër zien rolle in films wi-j De lift, Flodder en Amsterdamned. Hae hieët verschillendje tillevisieprogramma’s geprizzentieërdj en és de léste jaore stieëds dékker te vînge op de Nederlandse theaterpodia. Eîn van de bekindjste vuuërstéllinge és Mannen komen van Mars, vrouwen van Venus en ‘t wérreldjberoemdje verhaol ‘Intouchables’. Op ‘t momênt stieët Huub Stapel vôlop inne belángstélling doeër zien rol as hasjbaron in de Netflix spuuëlfilm Ferry. Ouch spuuëltj hae eîn van de hoeëfdrolle in ‘Flikken Rotterdam’.
Stapel és óngertösse woeënéchtig in Amsterdam, mer hae és Limburg altiêd traw geblieëve. Hae woor dan ouch zieër verieërdj wi-j ‘m woôrt gevraogdj of hae dieës bezûndjer óngerscheiding in ontvangst woeëj neme.
Uutreiking in november in Wieërt gieët neet doeër
Naodét in november duûdelijk woeërt det de uutreiking aan Huub Stapel op 26 en 27 november geine doeërgânk kóst vînge, és d’r gezóchtj nao ‘ne alternatieve datum.
Stadsvastelaovendjvereîniging de Rogstaekers hieët mótte constatieëre dét de oeëliefânt met de lang snoeët gekaome és nog vuuërdét ‘t sprookje begós.
Vör de uutreiking van de Orde van Gulden Humor aan Huub Stapel wurtj ‘n kleinschalig en veilig alternatief gezochtj.
Samewirkende Limburgse Vastelaovesvereniginge
De SLV hieët tot doelstélling ‘t in stând haoje en bevordere van de vastelaovendj as ‘n uuting van laevendje volkscultuur en folklore in Limburg. Vastelaovendj és ‘n belángriêk óngerdael van oeës Limburgs immaterieel êrfgood; lidjes, verhaole, dialecte, rituele, gebroêke en tradities.
