MUUËGELIKHEID TOT VUUËRINSCHRIÊVING
Juul, de kleine kwânte kwakkert
Uniek dialectsprookjesbook in gelimitieërdje oplaag verkriêgbaar
Stadsvastelaovendjvereîniging De Rogstaekers uut Weert prizzentieërtj Juul, de kleine kwânte kwakkert, ‘n uniek sprookjesbook, geschrieëve in 17 Limburgse dialecte. Op 26 en 27 november 2021 teîkene de Rogstaekers vör de organisatie van de festiviteite roontelum de uutreiking van de Orde van de Gulden Humor. Dieës hoeëgste Limburgse vastelaovendjoongerscheî-jing wurtj dit jaor uutgereiktj aan Huub Stapel. ‘t Thema van de Gulden Humor 2021 és Sprookjes bestaon. In de aanluîp nao ‘t evenemênt wurtj ‘t sprookjesbook in gelimitieërdje oplaag uutgebrachtj. ‘t Verhaol és geschrieëve doeër Mark Bouwmans en de prênte zeen geteîkendj doeër Rob Jacobs.
Op reis doeër Limburg
‘t Verhaol gieët oeëver de kleine Limburgse kwakkert Juul. Juul és gek van sprookjes en van vastelaovendj. Hae droumtjer van um doeër ‘n knappe prinses tot preens te waere gekusj. Um zien prinses te vînge hieëte ‘ne touverdrânk noeëdig, bestaondje uut 17 ingrediënte di-j te vînge zeen in de 17 plaatse di-j aangesloeëte zeen beej de Samenwirkende Limburgse Vastelaovesvereniginge. Same mét ziene gooje vrînd, de touvenaar Carnavales, gieëte op paad doeër Limburg. Ze make van alles mej. Waat dit book dus extra bezûndjer maaktj, és detj geschrieëve és in 17 verschillendje Limburgse dialecte: eder bladzi-j in ‘t dialect vanne plaats woeë ‘t aventeur zich afspuuëltj.
Vuuërinschriêving
Juul, de kleine kwânte kwakkert és ‘n uniek verzamelobject. ’t Moog dan ouch neet óntbraeke inne collectie van edereîn dae geintressieërdj és in dialecte. Daobeej ésj e book det alles in zich hieët um uut vuuër te laeze. ‘t Book és te koup vör € 19,95 per stök en wurtj eînmaolig in gelimitieërdje oplaag uutgebrachtj. Um zieëker te zeen van ‘n exemplaar ésj aan te raoje um gebroêk te make vanne vuuërinschriêving. Det kân t/m 28 augustus 2021 doeër ‘ne e-mail te steure nao info@guldenhumor2021.nl en € 19,95 per exemplaar oeëver te make op raekeningnummer NL90 RABO 0355 1487 06 t.n.v. Stichting Gulden Humor Wieërt. Bestéldje beuk kunne op zaoterdig 2 oktoeëber 2021 tösse 10:00 en 14:00 oor waere aafgehaaldj beej Wertha Brewpub, Bassin 6 te Wieërt.
Alle muuëgelike informatie oeëver de Gulden Humor vîngdje op de speciale website.
