Gouwe Rogspeld vör Theo Nouwen

12-11-2021

 
Oppe 11e vanne 11e és de Gouwe Rogspeld uutgereiktj aan oeëze zieër gewaardieërdje Theo Nouwen.

Theo és lid sieër 1988 en daome-j 3 × 11 jaor actief lid van Stadsvastelaovendjvereîniging De Rogstaekers. Gedeurendje de aafgeloupe 33 jaore hieët hae hieël wat rolle binne de organisatie van de Wieërter vastelaovendj vervöldj. Op dit memênt és Theo as Schatbewaarder lid van ’t besteur.

Met ziene groeëte en lange staot van deênst és Theo ’t gewiête van de vereîniging. Gae kuntj ‘m vraoge waat dejjae wiltj, hae weit dék ’t ântwoeërd op alle vraoge. Vör al zien verdeênste és hae uuteraard al dékker gedecorieërdj. Zoeë és Theo Commandeur in de Orde van de Rog, draagtj hae de SLV Orde van Verdienste en és hae lid in de Orde van Oranje Nassau. En dit jaor és dao de unieke Gouwe Rogspeld aan towgeveugdj.

Vae wînse Theo van herte prefisiat en vae hoeëpe um nog hieël vol jaore in oeës midde te hebbe.