‘Juul, de kleine kwânte kwakkert’ nog verkriêgbaar

02-01-2022

[widget id="custom_html-3"]

Op vriêdig 1 oktoeëber és in de historische Paterskêrk oppe Beest de bookprizzentatie gewaesj van ‘Juul, de kleine kwânte kwakkert’. De ieërste exemplare zeen doeër Kanseleer Jasper Heesakkers uutgereiktj aan börgemeister Raymond Vlecken en aan Bart Maes, prizzedênt van de Samenwirkende Limburgse Vastelaovesvereniginge. ’t Book woeërtj uutgebrachtj in de aanloup nao de (jaomer genog aafgelaszje) Gulden Humor in Wieërt op 26 en 27 november. ’t Verhaol és geschrieëve doeër Mark Bouwmans en de prênte zeen geteîkendj doeër Rob Jacobs.

 

Uniek verzamelobject vör dialectleefhebbers

‘Juul, de kleine kwânte kwakkert’ és ’n now sprookjesbook, geschrieëve in 17 Limburgse dialecte. ’t Verhaol gieët oeëver de kleine kwakkert Juul. Hae és gek van sprookjes en van vastelaovendj en droûmtj d’r van um doeër ‘n knappe prinses tot preens te waere gekusj. Um zien prinses te vînge hieët hae ‘ne touverdrânk noeëdig, bestaondje uut 17 verschillendje bestânddaele, di-j te vînge zeen in de 17 plaatse, di-j zeen aangesloeëte beej de Samenwirkende Limburgse Vastelaovesvereniginge. Waat dit book extra bezûndjer maaktj, és det ’t és geschrieëve in 17 verschillendje Limburgse dialecte, eder pagina in ’t dialect van de plaats, woeë ’t avvonteur zich aafspuuëltj. Oppe léste pagina van ’t prookjesbook zeen vör ’t laezersgemaak twieë QR-codes towgeveugdj, woeëmej de Nederlandse vertaling en de vertaling in ’t Wieërter dialect kunne waere opgehaaldj.

Exemplaar bestélle

’t Sprookjesbook és einmaolig in bepêrkdje oplaag uutgebrachtj. Dit unieke book és nog verkriêgbaar.

Steurtj ’n mailtje nao info@vvderogstaekers.nl met ’t aantal beuk, dejjae wiltj bestélle, eur adres en mobiel tillefoonnummer. Gae kriegtj dan vaneiges ’n betaalverzeuk à € 19,95 per stök en nao ontvangst van de sênte ’t book aan hoês. In de gemeindjes Wieërt en Ni-jwieërt wurtj gratis aan hoês bezörgdj. Daoboete wurtj eur bestelling opgesteurdj; de verzendkoste zeen € 6,95 per 1 of 2 stöks.

 


Foto's van de bookprizzentatie inne Paterskêrk staon in de âlbum van 2021.

 
Inne Wertha Brewpub waas 't zaoterdig 2 oktoeëber 'n kaome en gaon van minse, di-j eur gerisservieërdje exemplaar van 't sprookjesbook koeëme aafhale. Oppe foto kriegtj May Steen 't book uutgereiktj doeër Jan van de Port. Inne midde Wil Berben, dae de administratie beejhieël.