Wieërt és tiêdes 't jaorcongres van de Närrische Europäische Gemeinschaft (NEG), dit jaor in 't Frânse Nantes, verkoeëze wis ‘Närrische cultuurstad 2024’. De NEG és de koepelorganisatie vör carnavaliste op Europees niveau. 't És 'n samesmêlting van de in Europa gevestigdje nationale vereîniginge di-j de vastelaovendjtraditie in stând haoje. Nederland en in 't bezûndjer Limburg waere heej vertieëgewoeërdigdj doeër de Samewirkende Limburgse Vastelaovesvereniginge en de BCL Limburg. Eder jaor wurtj eîn stad tot Närrische cultuurstad verkoeëze. Wieërt wurtj daomej de ieërste Nederlandse Närrische cultuurstad.
Wéthaojer cultuur Suzanne Winters: “Ich bin gruuëts dét Wieërt verkoeëze és tot Närrische cultuurstad van 2024 en dan 't Vastelaovendjstékske van 200 jaor Vastelaovendjveerend Köln (2023) moog oeëverneme. Vastelaovendj és eîn van de aodste vôlkstradities van Wieërt en 'n belángriêk fieëst vör völ Wieërtenare. 2024 és vör os 'n extra speciaal jaor, aangezeen de Rogstaekers dan heure opmaot make vör heur 9x11-jubileumveering in 't sezoen 2024-2025."
Ouch Kanseleer Jasper és positief verrasj met dit nóws en guftj aan, det Stadsvastelaovendjvereîniging de Rogstaekers gaer heur beejdraag leêvertj um Wieërt as Rogstaekersstad ouch op de Europese kaart te zétte.
