Uutrooping Nowwe Vorst en Sezoensoeëpening

Op zaoterdig 12 november 2022 zal de Wieërter vastelaovendj weer ontwake en ’t Vastelaovendjveur waere óntstoeëke. Stadsvastelaovendjvereîniging de Rogstaekers gieët det huuëgelik en historisch memênt veere mét de uutrooping vanne nowwe Vorst.
Vreuger hoeszje de hieërsers oeëver Wieërt en umstreke oppe Beest aanne rând vanne Kestieëlsgraaf en dao zal ouch de 6e Vorst van Wieërt waere geprizzentieërdj en geïnstallieërdj.

Vorstelikke locatie
Vae nuuëje uch allemaol uut om te kaome kieke beej dit vastelaovendjspektakel, det um 19:11 oor presies.begintj beej ’t kestieël oppe Beest. Mejwêrking verlieëne ’t Gilde van Wieërter Stadsschötte St. Catharina 1480, de Streetsingers o.l.v. Noël Seerden en de Rogstaekers Big Band o.l.v. Björn Wiermans. Wieter zeen d’r speciaal optraejes van Sanne Heuijerjans, Marjos Metsemakers, Rick Weegels, Phil Aspers, Leon Tobben, Noël Seerden, Marcel Moonen, Dansstudio Release en Dansrijck. Monique van den Brandt teîkentj vör de presentatie. Wis de 12e.

Aansloêtendj aan de installatie van de nowwe Vorst van Wieërt zulle vae same de boetelocht vanne Beest inruuële vör de bâlzaal vanne Poort van Limburg. Heej wurtj vanaaf 20:30 oor de Aovendj vanne Nowwe Vorst geveerdj tiêdes de Oeëpening vanne Wieërter Vastelaovendj 2022-2023. Op dieëze aovendj kujje neet alleîn oeëze nowwe vuuërganger feliciteëre, mer uch ouch laote verrasse doeër ’n prachtig muzikaal programma, waat uch ’n aojerwets vastelaovendjgeveul zal gaeve.

Daovör zörge ónger mieër Erwin, de Geliënde, Paul & Leo, Stefan Wolter, Mark Gruythuysen, de winnaar van ’t Wieërter Vastelaovendj Lidjes Festival en deejay Sem Meevis.

Edereîn és van herte welkom.