Inschriêving Wichteroptocht 2023

02-01-2023

Hoi wichter,

Gae zultj waal dînke: “Wannieër huuëre vae noow ’s wat oeëver ’t inschriêve vör oeëze eige Wichteroptocht. De groeëte minse kinne zich al vanaaf hâlf november aanmelde um mej te doon aan de Groeëte optocht.”

Now, det zitj zoeë: beej de groeëte optocht mot det inschriêve waal ieërder gebuuëre, want dao kinne ze zich nao 19 jannewarie al neet meer aanmelde. Det keumtj, umdet de wages, di-j mej doon, motte waere gecontrolieërdj of alles waal veilig és en nog mieër van det meujlik gedeuts. As dan alle aanmeldinge binne zeen, gaon ’n paar slûm minse de optocht indaele, zoeëdet neet alle eînlinge achter mekaar kaome, mer ouch neet alle waages op een huipke achtereîn.
De Wichteroptocht begintj altiêd met de oeëpe wage met Roggie op de achterbânk en hae eindigtj neteurlik met dae schoeëne wage vanne Jeugdpreens. Dao tösse in kaome dan al di-j te gekke creaties, di-jjae alleîn, met de pap en de mam, eur vrînde of eur schoeël hetj gemaaktj.
En zoeë as altiêd kriegdjae dan nao aafloup ’n herinneringsmedaalie en ‘ne buul snuik. En neteurlik kujje eur best doon um eîn van de wisselpriêze te winne: de Kleine Gouwe Rog vör eure zelfgemaakdje kop (roeëd nummer), de Broonze Bakfiets vör ’n gruupke wichter met ’n beejzöndjer kèrke (blaw nummer) of de Zûlvere Knoeëk as dejje mejdootj met ’n groeëte groep (greun nummer).

180212-WichteroptochPrieesuutreiking_102.jpg

Vanaaf NOOW kindjae eur inschriefformeleer aafhale beej bookhândel Bruna oppe Mêrrentj (dao tieëgenoeëver de kêrk).
As dejje det dan same het ingevöldj, kân det dao ouch weer waere ingeleeverdj en kriegdje meteîn eur nummerke in de gooj kluuër mej.
Mekkelik zat, toch?!

Inschriêve kân wis donderdig 16 fibberwarie
Dus: op nao de BRUNA en haalt eur inschriefformeleer. Alvast völ lôl en succes gewînsj!

De optocht és op maondig 20 fibberwarie en begintj um 14:00 oor inne Stationsstraot.

Gae kintj d’r van alles oeëver laeze op de speciaal Wichteroptocht-pagina.