Zoek
Sluit dit zoekvak.
Zoek
Sluit dit zoekvak.

Jeugdpreens 2023: Kai I

22-01-2023

Aan ’t indj van ‘ne gezellige Boonte Femiêlie Middig és Kai van Gansewinkel op zoondig 22 jannewarie uutgeroope tot Jeugdpreens Kai I. De 71e Jeugdpreens van Wieërt és de aodste zoeën van Stadspreens Paul I van Wieërt en Lauri van Gansewinkel-Haex. Zösterke Aivi van 8 jaor en ‘t 4-jaorige breurke Phil make ‘t Preenselik hoêshaoje, dét aane Scheepsbouwkade woeëntj, complieët.

Oeëze Kleine Hoeëgheid bringtj e groeët dael van z’ne tiêd doeër in groep 8 oppe Muuëlenakker. Juf Kitty prebieërtj ‘m dao wat wiêzer te make. Dét véltj nog neet mej, want Jeugdpreens Kai I gieët gaer de discussie aan.
Boete schoeëltiêd zâl hae zich neet gaw vervaele. Zoeë zwumtj oeëze Jeugdpreens zien wédstriêde beej ZPC Ni-jwieërt en gieët hae gaer mountainbike én daonao vlaai aete met opa Bèr. Daonaeve mót hae álles zeen, huuëre en laeze waat met Formule 1 te make hieët en dan neteurlik in ’t bezûndjer alles oeëver Max Verstappen.
Zien orde hieët alles met dieës hobby’s te make. Jeugdpreens Kai I hieët namelik de “Orde van ’t Rappe Racerke” ingestéldj.

Vader en zoeën
Inne riêke gescheêdenis van de Wieërter vastelaovendj ésj nog noeëts ieërder vuuërgekaome det vader én zoeën de Rogstaekers as Preense vuuër gaon. De confetti stroûmtj beej dieës femiêlie doeër de aore, dus dét dieës unieke ieër uutgeraekendj aan Paul en Kai van Gansewinkel és wégkgelagdj és geine tówval.

Wi-j Jeugdpreens Kai I tiêdes de vastelaovendj van 2011 nog beej mam inne boeëk zoôt, wonne pap en mam met V.V. de Remmels de Gouwe Rog inne Groeëte Rogstaekersoptocht.
Dao hieët hae zellef e vervolg aan gegaeve doeër mer leêfst drej kieër de kleine Gouwe Rog te winne inne Wichteroptocht.
As klein mènneke hieët hae al dék mejgeloupe as bordjesdrager van B.C. Wieërters Echte en hieët hae al hieël wat oore staon plékke beej V.V. Hêldje op Zök. Ouch aane nowwe Jeugdpreensewage, dae hae dit jaor zellef vör ’t ieërst in gebroêk moôg gaon neme, hieët oeëze Jeugdpreens mejgehôlpe met plekke.
Vuuërig jaor, tiêdes de bezûndjere vastelaovendj van 2022, hieët Kai I vôlop genoeëte as lid van de Jeugdraod van Ellef, dae hae noow as Jeugdpreens van Wieërt vuuër zâl gaon.

Same met zien Adjudânte Déon Lemmen, Thijn Hilgers en Kiki Houben, Jeugdvorst Vince en ziêne Jeugdraod van Ellef en oeës leêf Huppelpupkes zâl Jeugdpreens Kai I de Wieërter wichtervastelaovendj vuuërgaon ónger zien devies:

Formule 1 aane kânt, vastelaovendj és in ’t Wieërterlând.
Det veere vae MAXimaal, met di-j Preense vanne knaal!

(foto's: FLITZER! fotografeert)


Foto's van Jeugdpreens Kai I op dieës website: