Tiêdes de Boonte Aovendj van zaoterdig 28 jannewarie 2023 és Kanseleer Rob Hermans beneumdj tot Groeët-Offeseer in de Orde van de Rog.
In 1995 waas Rob as jonge kaerel al betrókke beej de Rogstaekers. As lid van 't Wêrkmeistersgilde hieët hae met met hieël wat decorstökke gesleîptj en völ podia opgebawdj. Of 't noow 's mêrges of saoves waas, hae stóng klaor, en altiêd met völ tówwijding en 'ne aanstaekelike lach. Det hieët d'r tow gelèdj, det hae in 2000 és gevraogdj um lid te waere van de Rogstaekers. Met Peter Coumans as lieërmeister hieët hae 11 jaor gefungieërdj as Sirremoniemeister, woeëbeej details en protocolle heilig vör 'm ware. Nao di-j periode és hae de groeëte mân gewoeëre achter de Boonte Aovendje en Femiêlie Middige. Alles waerdje doeër hem geregeldj en hae waas 'ne echte verbînger tösse artieste, decorbawwers, tonieëlmeisters en 't theater.
In 2017 koeëm hae beej 't besteur met Theaterzake in zien portefeuille. Nao hieël völ wêrk verzatte te hebbe vör 't aafscheid van Vorst Jan, woeërt hae gevéldj doeër 'n zîkdje en mós noeëdgedwônge 'n stap trök waere gezatte, mer hae és d'r boeëvenop gekaome. Rob és in november 2019 beneumdj tot Kommissaris, mer mós binne de kortste kieëre de take van 'ne Kanseleer d'r beej pakke, umdet de toenmalige Kanseleer Jasper Heesakkers mós gaon fungieëre as vuuërzitter. In mei 2020 woeërt Rob officieel vice-vuuërzitter. Begîn jannewarie van dit jaor koeëm dao de intallatie as Kanseleer beej.
Âl met âl rieëje genog um Rob Hermans te beneume tot Groeët-Offeseer in de Orde van de Rog.
