Op zaoterdig 21 jannewarie és aan ’t indj van ’ne práchtige Gala Boonte Aovendj de 38-jaorige Paul van Gansewinkel uutgeroope tot Stadspreens Paul I.
Oeëze nowwe Hoeëgheid, de 77e Stadspreens van Wieërt, és de zoeën van Bert van Bèr van Huupke en Wil van Harry en To Koppen en de jongere broor van Ester. Hae és geboeëre oppe Beest en later és ’t hoêshaoje verhoêsj nao ’t Groenewoud.
Bert en Wil Van Gansewinkel zeen échte vastelaovendjveerders. Ze woôre aktief lid van V.V. de Vengnaaze en hebbe daomej 4 kieër de Gouwe Rog gewonne. In 1983 woor pap Adjudânt beej Preens Ad I vanne Rogstaekers en nog altiêd wille ze hieëlemaol niks vanne vastelaovendj misse.
Op zien 20e hieët de Rogstaekerspreens zien vraw lieëre kinne. Lauri és e dochter van Bèr Haex van Bert en Nel vanne Krim vanne Schuttershoeve en Marlies van Harrie en Lies van Deursen van Husseve.
Lauri en Paul zeen gaon samewoeëne inne Hégkstraot, woeënao ze e hoês op Vrouwehof gebawdj hebbe. Wi-j de Preenselikke héndjes wieër begóste te juuëke óngerging ’t huidige peliês aane Scheepsbouwkade e complieëte metamorfose.
Nao de ieërste paar jaor allein gewoeëndj te hebbe, woôrt ’t tiêd um ouch de ongebroêkdje slaopkamers e bestumming te gaeve en des hieël good gelöktj.
De aodste zoeën hétj Kai en és 11 jaor. De 8-jaorige Aivi és ’t zönneke in hoês en de kleinste raekel és Phil van 4 jaor.
Met zulke gouwe héndjes és ’t neet vrieëmdj det oeëze Stadspreens de kost verdeêndj inne bouw. Same met zien compagnons Tom van der Ouderaa en Huibert Roost zwejtj hae sinds 3 jaor de scepter beej Aannemersbedriêf Haex en HBR Tummerwêrke. Dao waere kerwejje aangenoeëme van ‘ne daakraam wis ’n project van e wuuëning of 10-15 én alles woeë wat aan te verdeêne véltj.
(foto's: FLITZER! fotografeert)
Vastelaovendj hieët zien hieële laeve al wi-j ‘ne roeëd-gael-greûne draod doeër ’t laeve van Preens Paul I geloupe. Met V.V. de Vengnaaze deej hae al mej aan de Wichteroptocht en in 1996 woôr hae uutverkoeëre um de Wieërter Wichtervastelaovendj vuuër te gaon as Jeugdpreens Paul II van de Rogstaekers.
E paar jaor later woôrt met e paar kammeräöj V.V. de Remmels opgerichtj woeëmej eder jaor groeëte wages woôrte gebawdj. In 2006 en 2011 woôrt de allerhoeëgste ieër behaaldj met ’t winne van de Gouwe Rog.
Wi-j dao ‘n indj aan és gekaome woôrte de wages gebawdj met B.C. Wieërters Echte. Helaas és dao noeëts mieër ‘ne Gouwe Rog mej gewonne mer gruuëts és oeëze Hoeëgheid waal op de schoeën wages di-j daomej oppe straot woôrte gebrachtj.
Naeve de vastelaovendj volgtj de Rogstaekerspreens gaer de Formule 1 en kaartj hae eine kieër per maondj met zien kammeräöj (mer dék ésj mieër wat klasjenieëre met e pilske d’rbeej as kaarte). ‘t Bourgondische laeve bevéltj ‘m goot, lekker êrges wat aete en drînke. Um d’r toch zoeë gestroûmliendj uut te bliêve zeen és hae op zoondigmêrge te vînge in ’t bos beej d’n Iêzere Mân um dao met ‘ne groep van Active te sporte.
Stadspreens Paul I, dae völ minse ouch zulle kinne as Paultje, és ‘ne gruuëtse Wieërter jóng. Gruuëts op zien hoêshaoje, gruuëts op zien wêrk en gruuëts op de Wieërter vastelaovendj. Daorum hieët hae “De Orde van ’t Gruuëts Paultje” ingestéldj.
Same met zien Adjudânte Ester Houben-van Gansewinkel, Tom van der Ouderaa en Edwin Lormans zâl hae de Wieërter vastelaovendj vuuërgaon ónger zien devies:
Noow geîn hoêze… mer ’n fieëstje bawwe.
Dét veere vae maximaal, met di-j Preense vanne knaal!
Foto's van Preens Paul I op dieës website:
Zaoterdig 21 jannewarie 2023 és Stadspreens Paul I van de Rogstaekers uutgeroope. Dion Huiberts hieët in dieës compilatie vastgelagdj waat d'r gebuuërtj in de oore tösse de Vuuërontvangst beej de Gala Boonte Aovendj en 't fieëst in 't Munttheater nao de uutrooping, woeëbeej d'r vör hieël wat minse 'n indj kwoeëm aan 'n periode van stilzwieëge. D'r kós eindelik gerösj waere geroope: "Hae ésse dan, eure en oeëze Stadspreens 2023: Paul I."
