Tiêdes de veerdje Boonte Aovendj op maondjig 23 jannewarie 2023 zeen Rosan Camp, Theo Houben en Emiel van Riet gedecorieërdj doeër 'n aafvaardiging van 't besteur van de SLV, de Samewirkende Limburgse Vastelaovesvereniginge.
Traditioneel bringtj 'n delegatie van 't SLV-besteur 'n bezeuk aan Wieërt oppe de Boonte Aovendj op maondjig en dits kieër bestóng di-j uit veer mân, woeëbeej de inbring van Wieërt met 50% good vertieëgewoeërdigdj waas in de persoeëne van presidênt Bart Maes en vice-vuuërzitter Jan Stroek. En ze waare neet met lieëg hang gekaome, want in 't medaalieköfferke van de oeëverkoepelende vastelaovendjorganisatie in Limburg zoeëte mer leefst twieë Ordes van Verdienste en 'n Zilveren Buut. De Orde van Verdienste waas d'r vör Theo Houben en Emiel van Riet, di-j in hun 11-jaorig lidmaatschap beej de Rogstaekers di-j verdeenste in verschillendje kemissies en op tal van wêrkplekke hebbe waorgemaaktj. De Zilveren Buut waas wégkgelagdj vör de totaal verraszje en geëmotionieërdje Rosan Camp. Al jaore drètj Rosan mej beej de Boonte Femiêliemiddig en het hieët intösse as artiest de oeëverstap gemaaktj nao de Boonte Aovendj. Ouch deut 't al jaore mej aan de Rogstaekersoptocht en bringtj dao vörâl de knouwel op straot. Âl met âl rieëje genog um dieës minse 'ne kieër extra in 't zunke te zette.
♦ Emiel van Riet (links) en Theo Houben zeen gruuëts op eur Orde van Verdienste
(foto: Johan Horst)
♦ Rosan Camp és mer wat bli-j met de ontvânge Zilveren Buut
(foto: Johan Horst)
