As op zoondig 19 fibberwarie 2023 de Rogstaekersoptocht oeëver de Wieërter singels trektj, zâl 't publiek werschiênlik wul beseffe, det d'r völ tiêd en dînkwêrk aan vuuëraaf és gegânge vör alle deîlnemers um eur creatie zoeë schoeën en kluuërriêk te toeëne aan de minse langs de kânt. Toch keumtj dao hieël wat mieër beej kieke, zieëker beej 'n speciaal categorie van dieës optochtbevôlkers: de bawwers van groeëte wages.
Maondje zeen ze bieëzig met bedînke en ontwêrpe van eure inbreng nog vuuër det d'r 'n tang of 'ne vêrfbörstel aan te pas keumtj. As 't dan eindelik zoeë wiêt és, wurtj de bawloeëds opgezochtj en waere d'r aovendje en zaoterdige en zoondige doërgebrachtj met allerli-j klusjes: lasse, boeëre, plèkke, schîldere en waat d'r nog mieër allemaol aan te pas keumtj beej 't make van 'ne groeëte wage. Intösse kaome op de hoêsadresse ouch de noeëdige nèjmechines op taofel, want ge begriêptj, det d'r ouch hieël wat aandacht wurtj besteedj aane pekskes van de groep.
Lede van de optochtkemissie van de Rogstaekers brînge in de waeke, di-j aane optocht vuuëraaf gaon, mieërdere kieëre 'n bezeuk aan de bawlocaties. Dèk és zoeë 'n bezeuk 'n (al dan neet hernowdje) kinnismaking met de bawwers en ouch 'n teîke van waardieëring vör al heur inspanninge um van de Wieërter optocht 'n succes te make. Mer aeve zoeë belangriêk és de aandacht vör motto en uutveuring, zoeëdet dao raekening mej kân waere gehaoje beej de samestelling van de optocht. D'r wurtj ouch gelétj op aafmaetinge, gebroêkdje technieke en materiaole, de kluuëre en de aafwêrking. Wieter és d'r aandacht vör 'n belangriêk facet: de veiligheid. Zeen de verzieëkeringe op orde en és d'r 'n noeëdstopinstallatie aanwieëzig?
Eder jaor és beej eîn van dieës bezeuke de Stadspreens presênt. Dits kieër waas 't op zaoterdig 4 fibberwarie, det Preens Paul I, vergezeldj doeër adjudânt Edwin, getuûge mocht zeen van de inspanninge van zien concurrênte, want zoeëwi-j dejje messchien wètj és Zieëne Hoeëgheid 'ne fanatieke bawwer beej B.C. Wieërters Echte. Dieës club woeërt dan ouch as létste bezochtj en vörzeen van 'n krat drînke.
't Spriktj vör zich det Preens Paul de noeëdige aandacht haaj vör de vorderinge beej de diverse vereîniginge en in geanimieërde gesprekke woeërt d'r verteldj oeëver de ups en downs van de aafgeloupe sezoene. Det gebuuërdje beej De Doorzetters in Zoeërik, De Fieëstbieëste in Ell en zieër zieëker ouch beej De Flausmause in Beûl. Dieës vereîniging bestieët al vanaaf 1977 en hieët al di-j jaore de Wieërter optocht bezochtj. 'ne Mân van 't ieërste oor, Bert Verhees, és nog altiêd te vînge in de loeëds, woeë doeër 'n enthousiaste group manne en vröllie wurtj gelasj, geschoordj, gekitj en geplektj. Bert: "Sterk pûnt van oeës vereîniging és, det vae van begin aaf aan hebbe gewêrktj met 'n groeëte groep vastelaovendjgékke van alle laeftiêde en altiêd hebbe oeëpegestânge vör now ideeë. Det was toen zoeë en det és noow nog zoeë en det és 'n vuuërwaarde um d'r vör te zörge det de Vastelaovendj blieftj bestaon." Woeëvan akte met völ respect en chapeau vör dieëze vastelaovendjveerder in hért en neêre.
