Tiêdes 'n korte sirremonie in de SooS oppe Mêrrentj waas op zaoterdig 11 november de aaftrap van 't vastelaovendjsezoen 2023-2024. Klokslaag 11 oeëver 11 woeërt ’t vastelaovendjsezoen geoeëpendj doeër 't opzette van de staeke doeër de lede van de Rogstaekers. Nao 'n jaor aspirânt te zeen gewaesj lagte Raymond Keulen en Luuk Hermans de eed aaf en waerdje daomej permanênt lid van de Rogstaekers. As now aspirântlede woeërte vuuërgesteldj Witger op den Kelder, Jasper Bokken, Paul van Gansewinkel, Edwin Lormans en Tom van der Ouderaa.
Vör eur jaorelange inzet vör de vastelaovendj waerdje Yvonne Nies, Marie-Louise van den Bosch en Witger op den Kelder beneumdj tot Offeseer in de Orde van de Rog.
Vervôlges waas 't woeërd aan Els Maes-Verdonschot, ontwêrpster van 't now pinke van "Ich bin 'ne Rogstaeker®". Els mogt ouch de ieërste pinkes uutreike en det gebuuërdje aan de jongste daelnemers, de twieëling van 't echtpaar Wolter, dae op 19 april van dit jaor és geboeëre.
Umliêsj doeër de klânke van Kepél Um te Bäöke bezochte de Rogstaekers daonao nog diverse kefees inne Wieërter binnestad.
'n Impressie van de sezoensoeëpening in en beej De SooS doeër 't aug van Johan Horst kujje zeen onger de knop:
