v.l.n.r. John Cardinaal (De SooS), Mark Vialle (Stichting Behoud van Beleving), Jasper Heesakkers (VV de Rogstaekers)
[foto: Johan Horst]
Stadsvastelaovendjvereîniging De Rogstaekers, Stichting Behoud van Beleving (Wieërt A‑laaif) en Stadscafé de SooS bundele heur krachte tiêdes Vastelaovendj 2024. Noow de 11e vanne 11e in aantocht és, zeen de vuuërbereidinge vör ‘t nowwe sezoen vôlop bieëzig. Kaomendj jaor zulle de groeëte Vastelaovendjaktiviteite centraal georganisieërdj waere in hértje Wieërt en zâl d’r van vriêdig wis dieënsdig ‘n breîd en gevarieërdj programma waere aangeboeëje.
Fieëst op twieë pleine inne binnenstad
Zoeëwaal oppe Nowwe Mêrrentj as oppe Mêrrentj keumtj ‘n groeët podium met oeëverkapping te staon. Naeve ‘n uutgebrédj muzikaal programma és d’r ouch ruuëmdje vör de tradities di-j beej de Wieërter Vastelaovendj huuëre. Dînktj daobeej aane officiële aaftrap vanne Vastelaovendj doeër de Stadspreens op zaoterdig, de priêsuutreiking vanne Groeëte Rogstaekersoptocht op zoondig en ‘t verbörre vanne Rog tiêdes de abdicatie op dieënsdig.
Oppe Nowwe Mêrrentj zâl Wieërt A-laaif op zaoterdig en zoondig ‘n uutgebrédj programma nieërzétte boeërdevôl Limburgse en Wieërter Vastelaovendjartieste.
Doeër de Vastelaovendj wieër groeëts inne Wieërter binnestad te veêre, verwachte de organisaties dét ouch de kefees inne binnestad kunne mejlifte op ’t bezeûk van völ minse. De boeteprogramma’s stoppe tiêdig zoeëdét d’r vör de échte Vastelaovendjveerder nog ruum tiêd és um eîn van de gezéllige kroege in te duike.
Deurzaam samewêrking
Tiêdes de aafgeloupe maondje hebbe de betrókke perti-je samegewêrktj aan ‘n meneer um de Vastelaovendj vör noow en vör de tówkomst deurzaam te organisieëre. Daobeej és ouch oeëverlégk gewaesj met de gemeîndje. Met dânk aan dieës krachtige samewêrking kunne programma’s optimaal op deîndânger waere aafgestumdj. Doeër de ligging van de twieë pleine vînge alle aktiviteite op loupaafstând van deîndânger plaats. Met name op zoondig waere alle registers oeëpegetrókke: de Groeëte Rogstaekersoptocht, ‘t artiesteprogramma van Wieërt A-laaif oppe Nowwe Mêrrentj en de fieëstelikke priêsuutreiking met muzikaal umliêsting op ‘t podium beej de SooS zörge vör ein groeët fieëst inne Wieërter binnestad.
Programma binnekort bekindj
De kaomendje waeke zâl ‘t definitieve programma wieter uutgewêrktj en bekindjgemaaktj waere via de kanale van De Rogstaekers, Wieërt A-laaif en de SooS. Markieërtj noow alvast de Vastelaovendjsdaag in eure agenda, want van 9 wis 13 fibberwarie kân ederein zich óngerdoômpele in ‘n wêrm Vastelaovendjbad in hértje Wieërt.
