Tiêdes de Boonte Aovendj van zaoterdig 2o jannewarie 2024 zeen Peter Nies en Berto Weekers beneumdj tot Groeët-Offeseer in de Orde van de Rog.
Peter Nies
Tot indj vuuërige ieëw waas Peter lid van ein van de aodste actieve Wieërter optochtvereîniginge, de Kauvers, van woeë uut hae in 1999 de oeëverstap hieët gemaaktj nao De Rogstaekers. De optocht hieët altiêd in zien hert gezaete en det hieët hae tot vandaag de daag noeëts losgelaote. Hae woor al drek actief beej ’t FOS, oftewaal de Optochtkemissie, woeë hae ’n hieël aantal jaore de rol van vuuërzitter hieët vervöldj. Ziêne aanpak és altiêd recht doeër zieë.
De Groeëte Rogstaekersoptocht és ein van de hoeëgtepûnte in Wieërt met de vastelaovendj en dao zeen vae met z’n alle hieël gruuëts op. Peter és pas contênt wannieër de Preensewage vörbeej de Tram és getrokke en alles dae daag good és verloupe.
De vergunningsaanvraog vör al oeës aktiviteite ligktj in Peters hâng en det és neet niks. Dao woeë ’t vreuger nog um 2 A4’tjes ging, zeen ’t tiêgewoeërdig komplieëte beûkwêrk di-j de noeëdige aandacht en energie vraoge. Binne de vereîniging kunne vae altiêd raekene op eurzien ieërlike meining. Peter neumtj zichzelf daodoeër waal ‘s ’n vervaelendj lid. De vereînigin neumtj det leêver ’n betrokke lid. Zoonger wriêving, geine glans.
Peter és al ’n kwart ieëw aktief lid van Stadsvastelaondvereîniging De Rogstaekers. Hae hieët zien spoeëre binne de Wieërter vastelaovendj mieër as verdeêndj. Daorum és Peter Nies beneumdj tot Groeët-Offeseer in de Orde van de Rog.
Berto Weekers
In de jaore '80 begonne as optochtbegeleider és Berto in 2002 lid gewoeëre van Stadsvastelaovendjvereîniging De Rogstaekers. Daobeej és hae nauw betrokke gewaesj beej ’t Lidjesfestival, woeë meinig Wieërter vastelaovendjschlager és ontstânge. De leste jaore és Berto aktief beej de Inkomstekemissie, woeë hae ’n hieël aantal van oeës stiêpels ónger zien hoede hieët.
Met ziêne aanstaekelike gulle lach en schoeëne humor és hae ouch verantwoeërdelik vör ‘ne feine sfeer binne oeës vereîniging. As Wieërter jóng dae nao Mezeik getrokke és, wachte vae nog stieëds oppe daag det Berto wurtj uutgeroôpe as Preens van ’t Heilig Wammes. Mer noow alvast és Berto beneumdj tot Groeët-Offeseer in de Orde van de Rog.
