Op maondjig 15 jannewarie 2024 hieët 'n aafvaardiging van 't SLV-besteur de Boonte Aovendj van de Rogstaekers bezochtj. Det dieëje ze neet alleîn uut interesse vör de prestaties van de artieste op de Bühne, mer vörâl um 'n paar minse te bedânke vör eure inzet in 't vastelaovendjgebuuëre en dan met name in 't Wieërtse.
As ieërste Arie Verheijen, vanaaf 2013 lid van de Rogstaekers en van 2016 wis noow besteurslid Optochtkemissie, ouch wul bekindj ónger de naam FOS: Fieëst Oppe Straot. Vuuërhaer waas Arie jaorelânk optochtdaelnemer en wagebawwer beej De Deêpkiêkers, woeëbeej hae e paar kieër de Gouwe Rog hieët gewonne. Arie es 'ne mân van wuuërd en dade en hieët binne 't besteur altiêd 'ne neuchtere kiêk op de zake. De SLV hebbe dit alles beloeëndj met de Orde van Verdienste.
De Zilveren Buut ging nao de aodste nog actieve optochtvereîniging van Wieërt in de originieële samestelling. Vae hebbe 't oeëver CV de Dorstvlieëgels, di-j zeen opgerichtj op 12 augustus 1968. Vanaaf 1969 hieët de groep mejgedaon aan de Groeëte Rogstaekersoptocht, woeëbeej met de lokale politiek en/of gebuuërtenisse de draak woeërt gestoeëke. Humor, zégk mer knouwel, stónge heejbeej vuuërop. As hoeëgtepûnt moog hun creatie "Vae gaon neet wieter doeër de kni-jje" in de optocht van 1989 waere geneumdj. Daomej wonne ze neet alleîn de Knouwelpriês, mer ouch de Gouwe Rog vör 't hoeëgste aantal pûnte.
In de persoeëne van Anton Cornelissen en Ton Adriaens hieët de vereîniging twieë Rogstaekerspreense geleêverdj en as zoeën van Leon Stultiens kân Lennart wul de dèrdje Preens waere geneumdj. Lede van de Dorstvlieëgels zeen actief gewaesj as artiest en regisseur beej de Boonte Aovendje, decorbawwer, lid van de Rogstaekers en jurylid beej de Wichteroptocht en 't Toêt- en Blaosfieëst.
Uut eure hood keumtj ouch de Broonze Bakfiets, de priês vör de schoeënste en lolligste optochtcreatie inne Wichteroptocht, di-j doeër de wichter zelf gemaaktj és.
Wieter hieët de vereîniging 'n groeëte beejdraag geleêverdj aane totstândkaoming van 't Rogstaekersmonumênt tieëgenoeëver de St. Martinuskêrk.
En met de Vastelaovendjdaag 'n kefee uutbate met as hoeëgtepûnt de Miss Harry-verkeêzing keumtj ouch al op 't conto van de Dorstvlieëgels, di-j vör dit alles zeen óngerschei-je mét de Zilveren Buut van de SLV.
♦ Arie Verheijen ontvingtj de Orde van Verdienste
(foto: Johan Horst)
♦ Lede van CV de Dorstvlieëgels waere verrasj mét de Zilveren Buut (foto: Johan Horst)
Mieër foto's in de 
