Sinds jaor en daag zeen Wil Berben en Jac Frencken doondje met ’t archivieëre van âllerlej vuuërwêrpe, di-j mét de geschiedenis van de Rogstaekers te make hebbe. Neet alleîn vaantjes, medalies en elpees waere gerubricieërdj en opgeslage, mer ouch posters en gezétte en zelfs interne stökke vanne Rogstaekers waere gedigitalisieërdj um zoeë vör de toekomst bewaardj te bliêve. Mer waat wore ze begîn september bli-j mét ’n donatie, di-j ‘n ongekindje uutbrei-jing beteîkentj.
Leonie Linssen, aod-artiest beej de Bonte Aovendje, waas oppe zölder vör de zoeëvölste kieër ‘ne houp doeëze aan ’t verplaatse en dacht beej zien eige: “As ich di-j noow ’s aan de Rostaekers schînk, dan hebbe vae ’n win-winsituatie: ich hoof neet mieër te sjouwe en zeuj zeen d’r bli-j mej!”.
In de doeëze zitj namelik ’n groeëte verzameling historisch materiaol oeëver de Wieërter vastelaovendj. De start daovan és gemaaktj doeër Pierre Linssen, de opa van de mins van Leonie. Hae verzameldje van alles: krânte-artikele, foto’s, bökskes, posters en waat mer de meute waerd woeër. Schoeënvader Ton ging dao later me-j wieter en nao ziene doeëd pakdje Leonie en mânleef Pierre de draod van ‘t verzamele ouch op.
’t És ’n schitterendje verzameling met materiaol vanaaf 1897 (!) t/m 2017. Zoeë zitj d’r de originieële poster beej van de Wieërter optocht in 1897 (de ieërste woor trouwes twieë jaor ieërder, in 1895), mer ouch de allerieërste Rogstèkersgezétte, di-j zelfs in het Rogstaekersarchief ontbroêke.
Onnoeëdig te zègke det de Rogstaekers bezûndjer dânkbaar zeen, det Leonie en Pierre dieës verzameling hebbe wille oeëverdrage. Want met dieës geste és uniek materiaol vör ’t naogeslacht behaoje gebliêve.
