Boorebâl

Wannieër:Op maondjig 18 fibberwarie 2018
Wi-j laat:Vanaf 19:30 oor
Woeë ésj te doon:Inne Wieërter binnestad
Extra info:

 


V.V. de Rogstaekers maaktj tiedes dieës aktiviteit muuëgelik foto’s en/of video-opnamen vör publicatiedoelîndje.
Raodpleeg oeës privacyverklaoring, as dejje dao bezwaor tieëge wiltj make.

Vör völ minse és 't Boorebâl 'n evenemênt waat onlosmakelik verbônge és met de naderendje vastelaovendj:
"Zoonger boorebâl heb ich geine vastelaovendj", zégke ze dan. Ouch dit sezoen és dur weer un fieëst oppe maondjigaovendj, umdet 'ne knappe jong en 'n net maegdje vör eine aovendj e getrawdj stelke zulle zeen.

Op maondjig 18 fibberwarie 2019 vîngtj in Wieërt 't traditionele Rogstaekers Boorebâl plaats, inmiddels alwieër vör ‘t veerdje jaor trök in de Wieërter binnestad. Vuuërafgaondj aan de uutroping és d’r in 'n 9-tal horecazake booremoos aete en van dao uut trékke de gaste um 19:45 oor onger begeleiding van muziekkapelle nao de Mêrrentj vör de bekîndmaking van de boorefemiêlie.
Op 't bordes van 't Jacob van Horne Museum zal d’n Umbelder um 20:00 oor beginne met de uutroping van de aojers, getuuëge en broeëdspaar 2019. Aansloeëtendj zal doeër d’n Daeke 't broeëdspaar in de onecht waere verbônge. Nao afloûp van dieës sirrremonie zal d’r aan de femiêlie met broeëdspaar 'n receptie waere aangeboeëje in ‘n nog nader te bepale horecagelaegeheid di-j doeër Vorst Stan op ‘t bordes bekîndj wurtj gemaaktj. Wiêter tréktj de boorefemiêlie met meziekgezelschap “De Waerse Kuj” de stad in woeë in de bezeukendje horecagelaegehede 't fieëst van de boorebroêleft zal plaatsvînge.
Um 24:00 oor zal de ambtenaar van de Burgerlijke stand (oeëze Rogstaekerspreens) ‘t huwelijk ontbînge en 't broeëdspaar oppernoets met twieë veut oppe groond zette.


Heej de hoeëfdpersoeëne van 't Boorebâl van aafgeloupe jaor in bieëldj.

 

Broêd: Laura Kappert

Dit maegtje hultj van alles, as ’t mer gezellig és, ’t gieët gaer lekker aete en drînke met eure vrînd. Eur broor woor 14 jaor gelieëje Jeugdpreens van de Rogstaekers, vastelaovendj veere vingtj ’t eîn van de schoeënste fieëste in eur laeve. ’t Woeëntj boete Wieërt mer kân neet wachte tot ’t wieër trök kân verhoêze. Wêrke deût ’t met wichter van ’n paar waeke tot 4 jaor aod beej ’n bekindje wichteropvang op Schoor. ’t És ’n dochter van Karin de Barse en Desiré Kappert.

180129-BoorebalBroed

180129-Boorebal_052

 

Broêdegom: Mieck Bensen

Zien groeëtste hobby és vastelaovendjwages bawwe met zien eige vereîniging, hae hingtj gaer de artiest uut in de Boonte Femiêliemiddig, trektj de kèr beej de Wieërter Elluf. Daonaeve voetbaltj hae, zoeëwaal inne zaal as op ’t véldj in de M6. Hae taptj gaer ’n pötje beer, mer nog leever drînktje ze zêlf op.
Hae studieërtj Technische Bedriêfskunde aan de Fontys. Hae és ‘ne zoeën van Jos van Drina en Piet en van Karin van Riet van Geldorp.

180129-BoorebalBroedegom

 

Vader van de Broêd: Geer Beris

Hae wêrktj beej Aon (spraektj uut as Eeon) as senior accountmanager in verzieëkeringe vör bedriêve. Eîn van zien groeëtste hobby’s és motor ri-jje en hae spuuëltj de groeëtste en dikste toêt beej eîn van de beste kepelle van Wieërt. Pap és ‘ne zoeën van Piet de Mêlkboor en van Dora van Neele Harrie en Mieke van Doeves Graatje. Hae és lid van kepèl Um te Bäöke.

180129-BoorebalAojersBroed

 

Mooder van de Broêd: Anja Beris

Zeuj wêrktj beej de groeëtste bânk van ’t lând as inkoûpspecialist van verzieëkeringe vör allerli-j bedriêve. Gieët gaer wieët op verkânsie en és regelmaotig te vînge op ’t badmintonvêldj. Maaktj ouch al meziek beej eîn van de beste kepelle van Wieërt, namelik kepèl Um te Bäöke. Mooder és ’n dochter van Sjaak Bonné uut de Rieëkel in Beesel en van Ria Pauly uut Kapel in ’t Zândj in Remundj.

 

Mooder van de Broêdegom: Elian Coenen

Zeuj hultj neet alleîn van reîze mer ouch van vastelaovendj veere, és gaer oeëverâl beej, gieët op ziene tiêd ’n stökske renne um fit te blieëve en spuuëltj sax beej eîn van de beste kepelle van Wieërt: kepèl Gootgemootj. Mooder és ’n dochter van Piet van Lange Pier de tummermân Bieële en van Truus van Lei van Teune Pier.

180129-BoorebalAojersBroedegom

 

Vader van de Broêdegom: Henk Coenen

Hae hultj ouch van reîze (zulle ze wul same doon dan), gieët gaer vastelaovendj veere en és d’r ouch altiêd beej, gieët ouch gaer renne, fitnisse en probieërtj ouch meziek te make beej eîn van de beste kepelle van Wieërt en neteurlik és det ouch Gootgemootj. Pap és ‘ne zoeën Piet van Harry van de schîlder en van Lies van Cramers van Asten de kleî-jermaker.

 

Getuuge Broêd: Nancy Houben

Hobby’s zeen völ uut gaon aete en verkânsie veere, huer wêrk ligktj in kefee de Brouwer, woeë ’t regelmaotig te vînge és achter de tap. Al mieër as 20 jaor getrawdj met de schoeënste mins van de Oêlemêrrentj. És ’n dochter van Gunther Boll en van Lies van Truda en Sjeng van Reemers of te waal van Pietaf.

180129-BoorebalGetuugen

 

Getuuge Broêdegom: Jack Cardinaal

Hae hieët jaorelangk ‘n eige kroeg gatj same met zien broor, és noow ’t manusje van alles in de kroeg van zien broor, stieët regelmaotig vuuër, mer ouch dèk achter de tap. Zien hobby’s zeen beerkes tappe, op stap gaon en schoeën en ver reîze make met zien leef maegtje. Hae és ‘ne zoeën van Sjaak van Frénske van Mieke van de Wever en van Marianne van Haukes Henk en Streuve Grada.

 


Kiektj ouch us beej

29 november 2018

Op dieës pagina ‘n oeëverzicht van evenemênte, woeë dejje vör in kuntj schriêve of reservieëre. En ouch nog ânger zake, woeë dejje op kintj reagieëre.   Gae kintj nog kaartjes risservieëre en koupe vör de…

Reagieëre . . .

Lees meer

11 januari 2019

Hoi wichter, Gae zultj waal dînke: “Wannieër huuëre vae noow ‘s wat oeëver ‘t inschriêve vör oeëze eige Wichteroptocht. De groeëte minse kinne zich al vanaaf hâlf november aanmelde um mej te doon aan de…

Inschriêving Wichteroptocht 2019

Lees meer

10 januari 2019

Waat és uch altiêd beejgebliêve uut de tiêd dejje hetj mejgedoon aane Boonte Femiêlie Middigge en/of de Boonte Aovendje? In de aanluip nao ‘n now serie van nuuëge aovendje en twieë matinées vertellen artiesten oeëver…

‘t Momênt van . . . Marc

Lees meer
Mieër noets