Op dieës pagina un oeëverzicht van video's uut 't sezoen 2023
Völ kiek- en luuësterplezeer.
Op zoondig 19 fibberwarie 2023 trok de Groeëte Rogstaekersoptocht oeëver de Wieërter singels. Kiektj 'm heej nog 's trök, want Weert FM maakdje dao same met Special Events Productions (s-e-p) 'n schoeën registratie van.
"Kiek, det és Vastelaovendj!" zônge Phil en Nout beej de aafsloêting van de Seniorematinee op zoondig 12 fibberwarie 2023 in de Poort van Limburg. En geliêk hebbe ze, Want Vastelaovendj és vör joonk en aod en dan kujje d'r gerösj same eine gaon drînke, d'n eîne 'ne ranja en d'n ângere 'ne groeëte pot beer. As dejje mer lôl hetj. En met dieës klein groeëte manne kriegdje vanzelf Moerepetazie 2.0
'n Grappige animatie van Harrie van Esch, woeë-in Mark Fonteijn verteltj, wi-j 't Vastelaovendjprogramma van de Rogstaekers in 2023 d'r uut zuuëtj.
Zaoterdig 21 jannewarie 2023 és Stadspreens Paul I van de Rogstaekers uutgeroope. Dion Huiberts hieët in dieës compilatie vastgelagdj waat d'r gebuuërtj in de oore tösse de Vuuërontvangst beej de Gala Boonte Aovendj en 't fieëst in 't Munttheater nao de uutrooping, woeëbeej d'r vör hieël wat minse 'n indj kwoeëm aan 'n periode van stilzwieëge. D'r kós eindelik gerösj waere geroope: "Hae ésse dan, eure en oeëze Stadspreens 2023: Paul I."
Van de livestream beej de uutrooping en installatie van Vorst Jasper op 12 november 2022 és 'n schoeën compilatie gemaaktj. Di-j kujje heej zeen.
Gae kintj neteurlik allemaol det schoeën book van Juul, de kleine kwânte kwakkert. Dit book és in 2021 geprizzentieërdj inne aanluîp nao de uutreiking van de Gulden Humor aan Huub Stapel. Waat dejje messchien nog neet wisj, és det de belaevenisse van Juul en touvenaar Carnavales ouch op bieëldj zeen vastgelagdj. De schoeëne uutbîngel van dieës opnames kujje heej zeen.
Naodet in de aafleveringe 1 t/m 5 és trökgekieëke op de vorstehistorie van Wieërt en d'r effe és gekaltj oeëver "Weem wurtj de nowwe Vorst" kaltj Alf Poell met (de op det memênt nog neet uutgeroope) Vorst Jasper oeëver wi-j de Wieërter vastelaovendj d'r ut mot gaon zeen, terwiêl d'r toch raekening wurtj gehaoje met 't verlieëje en waat de kernpûnte van dieës veêring zeen. En neteurlik zeeje ouch nog effe 'n compilatie vanne uutrooping en installatie van Vorst Jasper met aansloêtendj de fieëstaovendj.
Op zaoterdig 12 november 2022 vóng de uutrooping en de installatie van Vorst Jasper plaats. Det gebuuërdje bij 't Kestieël aane Beest. Dieëze video és de vastlegging vanne livestream.
