Sluuëteloeëverdracht / Rog ophânge

Op zaoterdig 10 fibberwarie 2024 zulle twieë gewoeën Wieërter jónges de macht oeëver de Stad Wieërt in háng kriêge. Dan zulle de Stadspreens van Wieert 2023 en de Jeugdpreens van Wieërt vör drej daag lânk de hieërsers van Wieërt zeen.

Tiêdes de Sluuëteloeëverdracht in ’t Stadhoês zulle Opper-Opper-Rogstaeker Raymond Vlecken en zien college van B&W de Sluuëtel vanne Stadsport én de Sluuëtel van ’t Stadsachterpörtje uutreike aan de Preense van de Rogstaekers.
Vanaaf dét momênt és Wieërt drej daag inne ban van de vastelaovendj. Vanaaf dét momênt és de Macht aan 't vôlk!

Gae zeêtj van hérte genuuëdj um vanaaf 14:00 oor in ’t Stadhoês aanwieëzig te zeen beej de Sluuëteloeëverdracht, di-j gepaardj zal gaon met schêrpe speeches oeëver en weer. Laotj zeen dejjae ‘ne gruuëtse Wieërter Rogstaeker zeêtj en kótj verklédj nao ’t Stadhoês aane Wilhelminasingel um dit uniek evenemênt beej te woeëne. 

Nao aafloup zulle allebej de Preense oppe Mêrrentj laote zeen det de Macht aan ’t vôlk és en de aoje Rog van Wieërt ophânge aan ’t bordes van ’t aod stadhoês oppe Mêrrentj.