Zoek
Sluit dit zoekvak.
Zoek
Sluit dit zoekvak.

Orde van ’t Kammeräödje vör Rosan Camp

08-01-2014
 

Op de Boonte Aovendj van donderdig 23 jannewari zal doeër Vorst Jan de “Orde van ’t Kammeräödje uutgereiktj waere aan Rosan Camp.
Rosan es al vanaaf de jaore ’80 betrokke beej de Wieërter Rogstaekers vastelaovendj, as klein maegtje kwoom ’t in aanraking met de Boonte Wichtermiddig, as artiest en kértrekster hieët ’t verschillendje kleîn en groeëte rolle gespuuëldj.
In ’n later stadium wi-j d’r stieëds mieër nów artieste beej kwome hieët Rosan de taak van regisseur op zich genoeëme, tot heden ten dage deut ze det nog stieëds. Naeve ’t regissieëre van de Boonte Femiliemiddig schriêftj ze ouch tekste, lidjes en sketches en és ’t nouw betrokke beej de decor’s, attribute en klei-jer vör dieës middige. Ge moogtj waal zégke det ’t ’n echte regeltante és en zich oeëverâl met meutj. Of det nog neet allemaol genogt és deut ze jaorliks inne zoeëmer vör alle artieste en decórbawwers van de Boonte Femiliemiddig ‘ne gezellige BBQ organizieëre beej eur thoês. 
Vanuut de Boonte Wichtermiddig és Rosan al înkel jaore betrokke beej de Wichterfieëst-middig, woeë ze in de organisâsie en uutveûring kluuër gaeftj aan ’t gekoeëze thema. Daonaeve és ze betrokke beej Rog TV woeë ze o.a. ’t Rogzjoernaal prizzentieërtj. 
De orde van ’t “Kammeräödje” weurdj slechts eine kieër per jaor uutgereiktj en zal ten deil valle aan ‘ne persoeën of groep di-j zich op de achtergroond op ’n bezundjer meneer inzette vör de Rogstaekers en de Wieërter Vastelaovendj. Dit alles same maaktj ’t, dét Rosan Camp met recht ’n “Kammeräödje” van de Wieërter Rogstaekersvastelaovendj geneumdj moog waere.