Op zoondig 13 november 2011 oeëpentj Vorst Jan same mét de lede van Stadsvastelaovendjvereiniging de Rogstaekers ‘t vastelaovendj-sezoên 2011-2012.
De Rog, ‘t symbool van de Wieërter vastelaovendj, zal in ‘t fíeëstpaviljoen oppe Nowwe Mêrrentj waere binnegedrage. Aansloêtendj és ‘t Lidjesfestival mét de verkeezing van ‘t vastelaovendjlidje 2012.
Welk lidje weurtj de opvolger van “Vae veere zi-j aan zi-j” van vuuërig jaor, gezoonge doeër Ronald en Carien Moonen. De Wieërter vastelaovendj-schlager 2012 weurtj gekoeëze uut 11 lidjes. Onger de inzenders vanne lidjes en de uutveurendje artieste zitte weer ‘n aantal vertrawdje, mer ouch e paar now gezichte. De lidjes waere live gezoonge en begelédj doeër de Copperband Moorland. As bezeuker kujje mét ’n stumkaart, same mét ‘ne vakjury, bepaole welk lidje zal winne.
Tösse de twieë lidjesblokke in en na afloûp zulle bekindje plaatselike artieste ’t vôlk amezieëre. De prizzentasie van ‘t Lidjesfestival és inne vertrawdje hang van Monique Meulendijks-van den Brandt en Anton Moonen. De Nowwe Mêrrentj weurtj e vastelaovendjplein, komplieët mét fieësttênt, e podium en alle vörzeeninge, zoeëdet de bezeukers ‘t Lidjesfestival beej alle waer in ‘n komfortabel sfeer kunne mejmake. ’t Begîn van de middag és um 14.00 oor en zal um 18.00 oor waere aafgesloeëte.
Op vriêdigaovendj 11 november, vanaf 19.00 uur, kujje via Weert FM beloestere welke lidjes aan ‘t Lidjesfestival mejdoon. Wildje de oeëpening van ‘t now sezoên neet misse? Wildje mej beslisse in de kuuës van ’t vastelaovendjlidje? Zeeje ‘ne meziekleefhebber of gewoeën geïnteressieërdj? Komtj dan op zoondigmiddag 13 november 2011 nao de Nowwe Mêrrentj in Wieërt!!
Kliktj heej vör ’t program:
