Orde van ’t Kammeräödje vör Kitty Scheijmans

08-12-2011

Oppe Boonte Aovendj van donderdig 19 jannewari zal doeër Vorst Jan de “Orde van ’t Kammeräödje” uutgereiktj waere aan Kitty van der Meijs. Kitty és ’n dochter van Willem van der Meijs dae vreuger nouw betrokke waas beej de organizâsie via de hokkieklup van ’t Boorebâl en és getrawdj mét Thijs Scheijmans. Kitty és zieëker gein onbekindj inne Wieërter vastelaovendj, ze és ’n vastelaovendjveerster in hért en nieëre en asj effe kân heej ’t hieël jaor mej bieëzig.

As ongerwiêzerés oppe oeëpenbare basisschoeël De Graswinkel hieët ’t al meinig kieëre de wichter alles verteld oeëver dit stökske kultuur en aangespoeërd um dit toch zieëker in stând te haoje. Kitty zetj zich same met ’t hieël gezin in vör de wichtervastelaovendj van de Rogstaekers, met name és ’t nauw betrokke beej de organzâsie vanne wichterfieëstmiddig en kân de jeugdkemissie eder jaor ’n beroôp op eur doon.

Verder zörgtj Kitty met ’n aantal vreejwilligers d’r vör, um op ’n aantal goonsdigmiddige, same met wichter te bawwe inne Rogstaekershal en zoeë te stimulieëre en te hêlpe met ’t make van eur wichteroptocht-krejâsie. Op vastelaovendj-maondjig zitj Kitty alwieër hieël wat jaore inne zjurie van de wichteroptocht.

Daonaeve of ’t nog neet genogt és, és Kitty nauw betrokke beej de organizâsie van de Slaag um de Mêrrentj, ’n groeët spektakel op vastelaovendjdieensdig woeëdét ’t zich neet allein hieët bieëzig gehaoje mét de nówwe opzet mér ouch plaatsneemtj in de zjurie.

De orde van ’t “Kammeräödje” weurtj slechts eine kieër per jaor uuitgereiktj en zal ten deil valle aan ‘ne persoeën of groep di-j zich jaorelânk oppe achtergroond op ’n bezundjer meneer inzette vör de Rogstaekers en de Wieërter Vastelaovendj. Dit alles tesame maaktj ’t dét Kitty met recht ’n “Kammeräödje” van de Wieërter Rogstaekersvastelaovendj geneumdj moog waere.