Orde van ’t Kammeräödje vör Peter & John van Hoef
Oppe Boonte Aovendj van donderdig 10 jannewari zal doeër Vorst Jan de ‘Orde van ’t Kammeräödje’ uutgereiktj waere aan de hieëre Peter en John van Hoef, twieë breurs di-j al jaore beej oeëze Wieërter vastelaovendj betrokke zeen.
Peter en John zeen met ’t Rogstaekersvirus in aanraking gekaome ind jaore ‘70 begîn ’80 as chauffeurs van oeës Preense, wi-j di-j nog mét bedriêfsböskes van ’t ein nao ’t ânger bâl gebrachtj moste waere. Peter en John rieëje dan de böskes, eîn vör ’t Boorehermenieke en eîn vör ’t Preenselik gevôlg. ’t Gereidschap inne bös maakdje plaats vör de bênk vanne scouting. Nao aafloup brachte ze ’t Preenselik gezelschap ouch nog netjes nao hoês, wi-j laat ’t ouch waas, det maakdje vör dieës joonges neet uut.
Dieës hieëre krieëge de smaak te pakke en de optochte in bieëldj. Heej koste vae op eur raekene det oeës optochtwages veilig doeër de straote trokke, Peter as chauffeur van de Raod van Elfwage en John van de Jeugdpreensewage. Tot op vandaag doon ze det nog altiêd mét völ plezeer.
Vervolges zeen ze al vanaaf 1990 beej de Rogstaekers aktief beej ‘ne groep vreejwilligers dae zich mét name bieëzig héltj mét ’t klaorzétte vanne decorstökke oppe Boonte Aovendje (ieërder ’t Wêrkmeistersgilde), ouch heej zeen Peter en John mej van de kèrtrékkers. Det neet allein, ze zörge d’r ouch vör det de stökke vanne bawloeëds in ’t Munttheater kaome en waere trökgebrachtj.
Of det nog neet allemaol genog és moge vae altiêd e beroop doon op eure vreeje tiêd. Zoeë wore ze nauw betrokke beej de inrichting vanne Rogstaekersloeëds, hebbe ze mejgewêrktj aan de bouw van de Jeugdpreensewage, ri-jje ze de vrachtwages as d’r weer ’s spulle verveurdj motte waere vör oeës aktiviteite en zoeë kinne vae nog waal effe doeërgaon.
De orde van ’t “Kammeräödje” weurtj mer eîne kieër per jaor uutgereiktj en és bestumdj vör ‘ne persoeën of groep dae zich oppe achtergroond op ’n bezundjer meneer inzetj vör de Rogstaekers en de Wieërter Vastelaovendj. Dit alles same maak ’t det Peter en John van Hoef met recht “Kammeräödjes” van de Wieërter Rogstaekersvastelaovendj geneumdj moge waere.
