Kammeräödje 2016 vör Jac Frencken

21 december 2015

Vuuëraafgaondj aan de Boonte Aovendj van donderdig 14 jannewarie 2016 weurtj doeër Vorst Jan de "Orde van ’t Kammeräödje” uutgereiktj aan de hieër Jac Frencken.

Jac és ’n groeët aantal jaore gelieëje gestartj mét 't archivere van alle Wieërter vastelaovendjmeziek. Neet allein de meziek en directieperti-jje, mer zieëker ouch alle tekste e.d. Óngertösse ’n aantal jaore wieter és bekans alles ingescandj en gedigitalisieërdj en blieftj 't vör de towkomst bewaardj en beschikbaar.

Det Jac 't neet allein beej ’t archivere lutj és duuëdelik. In 2008 organizieërdje de Rogstaekers ‘t ieërste promsconcert mét muzikânte uut de veer Wieërter Hermeni-jje. Naoteurlik woor ’t Jac, dae vör alle muzikânte zörgdje det eure blaadmeziek vuuër aanvang vanne rippetisies komplieët woor. Kopieere, scanne niks woor um tevöl as edereîn mer de gooj perti-j haaj. Ouch vör ’t groeëte spektakelstuk van de Gulden Humor in 2010, “Efkes wat ângers” woor Jac duuëdelik in bieëldj.
’t Bleef neet beej ‘t kompletieëre van de blaadmeziek, Jac woor ouch neet te flaw um in ’t groeët orkest vanne promsconcerte mej te spuuële en tösse ’t rippetieëre doeër dan nog gaw effe 'n perti-jke vör dieëze of gene komplieët te make.

’t Archivere zitj dan toch in zien blood en inmiddels és Jac begonne mét ’t groeët Rogstaekersarchief van verslage, gezétte, fotoos, medalies en dergelikke, op te schoeëne en te digitalisieëre zoeëdet ’t ‘strakkes’ vör edereîn via de site vanne gemeindje in te zeen és. Eîne kieër inne waek és Jac same mét 'ne collega Rogstaeker te vînge in 't Gemeindjearchief of inne archiefruuëmdje vanne Rogstaekershal um oeës archief beej te wêrke.

Völ plezeer hieët Jac beej ’t op zeûk gaon nao nog ontbraekendje stökke, zoeëwaal vör de vereiniging of vör femiêlies di-j nog op zeûk zeen nao historisch materiaol. Dék haaldje det mét succes boeëve water, waat um dan weer völ voldooning guftj.

Naeve dit alles és Jac ouch neet te flaw um 'n aantal ânger zake op te pakke, dao woeë hae kân hêlpe esse vanne perti-j. As vreejwilliger achter de bar beej oeës aktiviteîte in ’t fieëstpaviljoen en Poort van Limburg, inrichte en aafbraeke van fieëstlocaties, ‘t mej inrichte van ‘n Rogstaekers expositie in de Tiendschuur en Munttheater en ’t project “Plevuuze Paad” van de Aod-Preense.

De “Orde van ’t Kammeräödje” wurtj slechts eine kieër per jaor uutgereiktj en zâl ten deîl valle aan 'ne persoeën of groep di-j zich op de achtergroond op “n bezûndjer meneer inzétte vör de Rogstaekers en de Wieërter Vastelaovendj. Dit alles same maaktj ’t det Jac Frencken mét recht 'n “Kammeräödje” van de Wieërter Rogstaekersvastelaovendj geneumdj moog waere.


Tags: -

Kiektj ouch us beej:

10 maart 2022

Dit jaor hieët V.V. de Rogstaekers, same met înkel kepélle, ’n aantal minse in ’t zönneke moôge zétte. Um verschillendje rieëje kriêge dieës minse inne aanloup nao de vastelaovendj van 2022 ’n bezeûkske van ‘n…

Serenades, Óngerscheidinge en Bloôme

Lees meer

25 februari 2022

Op dieënsdig 1 mieërt zal Jeugdpreens Sjoerd I d’r toch echt aan mótte geluive. Naodet hieël wat hermeniekes en kepelle ’s middigs ongetwiêfeldj vör de noeëdige meziek hebbe gezörgdj és ’t um 19:11 oor zoeë…

Dieënsdig 1 mieërt: Abdicatie

Lees meer

20 februari 2022

Op zoondig 20 fibberwarie 2022 kriêg Sjoerd I de sluuëtel van ’t stadsachterpörtje uutgereiktj doeër börgemeister Raymond Vlecken. Det gebuuërdje oppe trappe van ’t aod stadhoês oppe Mêrrentj. Aansloêtendj mocht oeëze Jeugdpreens nog hieël wat…

Sluuëteloeëverdracht Jeugdpreens Sjoerd I

Lees meer
Mieër noets