Sinds 1993 kinne De Rogstaekers ’n bezûndjer oongerschei-jing, di-j hoeëguut eins per jaor wurtj uutgereiktj. ’t Gieët heej um de Orde van ’t Kammeräödje, di-j eurtj towgekindj aan minse, di-j zich al jaore (en dék oppe achtergroond) verdeenstelik hebbe gemaaktj vör de Rogstaekers enne Wieërter Vastelaovendj. Terechte ontvânger van dieës Orde in 2019 és Will Hermans.
Will Hermans és begîn jaore nuuëgentjig lid gewoeëre van 't wêrkmeistersgilde en és dus al mieër dan 25 jaor actief vör de Rogstaekers. Lede van dit gilde waerdje dèk ingezatte beej alle evenemênte vanne vereîniging um te hêlpe beej ’t op- en aafbouwe van decors en beej ’t verseere van zalen as De Port van Limburg. Ouch hieët Will gehôlpe beej bezûndjer evenemênte as de Gulden Humor. Vaste taak haaj hae beej ’t verveur van decors en ’t wissele daovan beej de Boonte Aovendje en de Boonte Femiêlie Middige. Jaore lânk hieët Will d’r vör gezörgdj det paerd en kèr aanwieëzig wore beej de stoet vör ’t Boorebâl en det ’t broêdspaar op ‘ne draagbaar doeër de zaal waerdje gedrage. Hieël wat jäörkes és Will begeleider gewaesj van de Jeugdpreensewage in de optochte en hae zörgdje d’r ouch vör det de wages oppe tiêd oppe plaats van bestumming wore. Will és nog altiêd actief oppe Bühne tiedes de Boontje Aovendje. Mot d’r wat gebuuëre, vraogtj ‘t aan Will en ’t gebuuërtj ouch!
Uut hâng van Vorst Stan en in ’t beejzeen van Kanseleer Jasper en Sirremoniemeîster Dorus hieët Will alvast de beej de Orde huuërendje oorkonde moge ontvânge.
