Tiêdus ’t Cultureel Lint op zoondig 22 september és ’t mozaïek “De Rog” van de intösse gestôrve kûnstenaar Jan Tullemans aan het St. Raphaëlpad in gebroêk genoeëme. D’r és ’n gedînkplaat onthuldj mét dao op de name van alle betrokke perti-jje di-j de verplaatsing hebbe muuëgelik gemaaktj.
Onger regie van V.V. de Rogstaekers és d’r ondânks ’t groeëte aantal activiteite tiêdus ’t Cultureel Lint toch ’n klein momêntje gevônge um aandacht te besteje aan de ingebroêkname van ’n bezûndjer kûnstwêrk. Dit kûnstwêrk steltj de rog as symbool van de Wieërter vastelaovendj vuuër. Bezûndjer és det ’t mozaïek ieërder loog beej de vuuërmalige wuuëning van de ontwêrper Jan Tullemans aanne Emmasingel. De locatie vuuër de ingang van RICK en de onthulling van ’n gedînkplaat tiêdus ’t Cultureel Lint hieët ’t mozaiëk ’n speciaal tintje gegaeve.
In ’n bericht uut mei van dit jaor stieët mieër te laeze oeëver de verplaatsing van ’t mozaïek.
