Medalie ‘Kammeräödje’ uutgereiktj aan Jos Keersmaekers

31-01-2020

Oppe Boonte Aovendj van donderdig 30 jannewarie hieët Jos Keersmaekers de draagmedalie opgespeldj gekriêge die huurtj beej de Orde van ’t Kammeräödje.

Sinds 1993 reike De Rogstaekers de Orde van ’t Kammeräödje uut. Dieës bezûndjer oongerscheiding, di-j huuëgstes eîne kieër per jaor wurtj towgekindj, és in het laeve gerope as bliêk van waardieëring vör minse di-j zich al jaore (en dèk oppe achtergroond) verdeenstelik hebbe gemaaktj vör de Wieërter vastelaovendj en de Rogstaekers in 't bezûndjer.

Jos Keersmaekers és al sinds jaor en daag 'n stille kracht achter de schêrme. Beej evenemênte kân altiêd 'n beroop op hem waere gedaon as 't gieët um kaartcontrole en mûnteverkoup.  Zo hieët hae zich oonger ângere ingezatte vör 't Rogstaekerspaviljoen, de Gulden Humor, het Fieëst oppe Mêrrentj en de concerte van Harry en de Gebroeëke Zwiêgelkes.

In november 2019 hieët hae al de beeejbehuuërendje oorkonde gekriêge, toen hae as vreejwilliger aane gang waas beej ’t Huis van Nicolaas.