Maondjig 10 fibberwarie vingtj ’t traditionele Boorebâl plaats inne Wieërter binnestad. De waersvörspellingen zeen neet roeëskluuërig en d’r és raengel en storm op komst. Uut vuuërzörg és de broêloft daorum verplaatsj vanne Mêrrentj nao de foyer van ’t Munttheater.
Vanaaf 19:00 oor és de foyer geoeëpendj en és ederein van herte welkom. Um 19:30 startj heej de sirremonie en zal ’t boorebroêdspaar van 2020 bekindj gemaaktj waere. Daonao waere ze doeër de daeke en doeër Stadspreens Tim I inne onecht verboonge. Aansloeëtendj aane broêloft trektj ’t gezelschap de stad in en zal heel inkel kefees aandoon.
Vuuëraafgaondj aane broêloft kan d’r op diverse plaatse inne stad booremoos waere gegaete. Gedeurendje de aovendj beeje inkel kefees schoeën artiesteprogramma’s en ésj fieëst inne stad. Um 0:00 oor zal ’t broêdspaar weer waere ontbônge.
