Op 9 oktoeëber hebbe vae ’t trieste bericht ontvânge det oeës ‘Kammeräödje’ John van Hoef os plotseling és ontvalle.
John woor ‘ne mins dae zich jaorelânk met völ passie hieët ingezatte vör de Wieërter vastelaovendj in ’t algemein en Stadsvastelaovendjvereîniging de Rogstaekers in ’t bezûndjer.
Of ’t noow ging um ’t versjawwe van decorstökke tiêdes oeës Boonte Aovendje of ’t ri-jje vanne Jeugdpreensewage,
niks woor John te völ. Vör al zien verdeênste és John in 2013, same met z’n broor Peter, geieërdj met de ‘Orde van ’t Kammeräödje’. Vae verleêze in John ‘ne échte kammeraod en wînse zien breûrs, zöster, femiêlie en vrînde hieël völ stêrkdje beej dit groeët verleês.
