UUTGESTELDJ
(Laesj heej mieër informatie)
Stadsvastelaovendjvereîniging de Rogstaekers
prizzentieërtj de 6e Vorst van Wieërt
De Wieërter vastelaovendj ontwaaktj weer
Nao ángerhâlf jaor dörve vae weer te droûme van geschmînktje snoeëte, meziek in kefees en op straot. ‘ne Lach in ‘t theater en bónte kluuëre oppe singels. De Wieërter vastelaovendj ontwaaktj weer.
Stadsvastelaovendjvereîniging de Rogstaekers zâl op zaoterdig 13 november aanstaondje um 19:11 oor persies ‘t vastelaovendjveur doeër börgemeister Vlecken laote ontstaeke aanne rând van de Kestieëlsgraaf oppe Beest, dao woeë vreuger de hieërsers van Wieërt woeëndje.
6e Vorst van Wieërt
Ónger regie van Léon Stultiens zâl ‘ne spectaculaire show met mejwêrking van ‘t Gilde van Wieërter Stadsschötte St. Catharina 1480, de Streetsingers o.l.v. Noël Seerden, De Rogstaekers Big Band o.l.v. Bjorn Wiermans, Dansschoeël Fresh, Milo Seerden, Rick Weegels en Phil Aspers de opmars zeen nao de bekindjmaking van de nowwe vuuërgaenger van Stadsvastelaovendjvereîniging de Rogstaekers, dae aansloêtendj as 6e Vorst van Wieërt zâl waere geïnstallieërdj.
Aovendj vanne Nowwe Vorst
Aansloêtendj aan ‘t historische momênt op de Beest zâl um ongevieër 20:30 oor in de Bâlzaal van de Poort van Limburg ‘ne fieëstaovendj plaatsvînge um de oeëpening van ‘t nowwe vastelaovendjsezoen te veere. Uuteraard és heej vôldoôndje gelaegenheid um de nowwe Vorst van Wieërt gelök te wînse. ‘n Muzikaal programma zâl ‘t vastelaovendjgeveul complieët make.
Extra uutzéndinge Rog Tillevies
In opmaot nao dit groeëtse momênt zölle d’r waekeliks op woonsdig um 19:11 uur extra uutzéndinge zeen van Rog Tillevies, te volge via de (tillevisie) kanale van WeertFM, Weertdegekste, MLA, Nederweert24 en de sociaal mediakanale van de Rogstaekers.
In ‘n reeks van 5 aafleveringe neemtj aod-Wieërtenaar Alf Poell uch, in gesprek met bekindje vastelaovendjveerders, mej in de riêke historie van de Wieërter vastelaovendj.
Dieës uutzéndinge zeen op 13, 20, 27 oktoeëber en 3 en 10 november.
Op 13 november kân d’r vanuut de hoêskamer live waere ingeschakeldj beej ‘t spektakelstök oppe Beest.
