De zésje Vorst van Wieërt: Jasper Heesakkers

12-11-2022

Update 14-11-2022

Edereîn dae zaoterdig 12 november aanwieëzig waas beej de installatie van Jasper Heesakkers tot zésje Vorst van Wieërt hieët genoeëte van dit spektakel beej 't kestieël aane Beest.
Wildje nog 's trök kieke of kószje d'r neet beej zeen en wildje toch ouch waal és wieëte waat dao allemaol gebuuërdj és, kiek dan mer 's nao de video van de installatieplechtigheid.

Ouch zeen d'r hieël wat foto's gemaaktj, zoeëwaal van de installatie as ouch van de fieëstaovendj inne Poort van Limburg. Di-j staon op oeës speciaal fotopagina vör 't sezoen 2023.


 

In 'n historische setting vóng zaoterdigaovendj 12 november 2022 de uutrooping van de zésje Vorst van Wieërt plaats. Stadsvastelaovendjvereîniging de Rogstaekers pakdje groeëts uut um met dit huuëgelikke feit 't Wieërter vastelaovendjveur oppernoets te laote ontburre. 't Kestieël oppe Beest woor 't sprookjeséchtige decor, woeë met mejwêrking van tal van artieste, koeëre en meziekgezélschappe op 'n spectaculair meneer de nowwe Vorst van de Rogstaekers bekindj woôrt gemaaktj.

De 39-jaorige Jasper Heesakkers és 'ne zoeën van Pieter Heesakkers en Prudence van Muijen ('n dochter van Bertus de Volendammer, de vreûgere vésboor uut de Bieëkstraot). Z'n weêg stóng op Kieëntj en thoês hieët hae, same met z'n broor Felix, de vastelaovendj lieëre veere. In 1995 woor hae lid van de Jeugdraod van Ellef van de Vêrkusköp. De nowwe Vorst hieët 'n relatie met Colette Grijmans en és wêrkzaam in ’t Jocusriêk Venlo as communicatiemanager beej vidaXL.

Vorst Jasper és geine onbekindje in de Wieërter samelaeving. Zoeë woor hae ruuëm 12 jaor actief vör 't CDA Wieërt, woeëvan 5 jaor as gemeindjeraodslid. Ouch woor hae besteurslid van Hermeni-j St. Joseph Wieërt-Zuid. Sinds 2015 és hae lid van Stadsvastelaovendjvereîniging de Rogstaekers, woeë hae in 't begîn actief woor beej de PR-kemissie. In 2018 woôrt hae verkoeëze tot vice-vuuërzitter en as Kanseleer geïnstallieërdj.

Bekans 3 jaor gelieëje noeëm Jasper Heesakkers as Kanseleer al de vuuërzittershamer oeëver en hae zâl noow as zésje Vorst van Wieërt de taak van vuuërzitter bliêve vervölle. Vorst Jasper beloeëftj zich in te zétte um aoj tradities en now wînse te vereînige um zoeë de veêring en belaeving van de Wieërter vastelaovendj laevendj te haoje. De nowwe vuuërgaenger és bli-j en verieërdj met zien now rol en kiektj vôl vertrawwe uut nao 'n schoeën tówkomst.