Op zaoterdig 25 november woeërt Irene Kunnen-Weerts doeër Vorst Jasper verrásj met de tówkinning vanne Orde van ‘t Kammeräödje.
‘t Kammeräödje és ‘n speciaal óngerschei-jing van Stadsvastelaovendjvereîniging de Rogstaekers di-j hoeëguut eine kieër per jaor wurtj uutgereiktj aan ‘ne persoeën of groep dae zich op ‘n bezûndjer meneer en vörâl op de achtergrónd verdeênstelik hieët gemaaktj vör de Wieërter vastelaovendj in ‘t algemein en De Rogstaekers in ‘t bezûndjer. De orde woeërt in 1992 vör de ieërste kieër uutgereiktj.
Verdeênste Irene
Irene és geboeëre en getoeëge Wieërtse en vastelaovendjveerster in hért en nere. Al völ jaore és ze vuuër en achter de schêrme actief. Zoeë és ze 22 jaor as spuuëlster en as schriêfster verbónge gewaesj aane Boonte Femiêliemiddig en és ze al ‘n aantal jaore as klei-jingdame en grimeuse betrókke beej de Boonte Aovendj. Daobeej kân d’r altiêd ‘n beroop op heur waere gedaon beej speciaal projecte, woeë-ónger ‘Rogstaekers - De legende’, de spektakelmusical dae doeër de vereîniging in 2014 woeërt gerealisieërdj in ‘t kader van ‘Weert 600 jaar stad’. Boete al dieës verdeênste vör de Rogstaekers és Irene al völ jaore optochtdaelnemer en woor ze lange tiêd lid van de Lambieck Knoup. As tekstschriêfster hieët ze verschillendje vastelaovendjlidjes op heure naam staon en won ze zellefs twieë kieër ‘t Lidjesfestival. Uuteraard és Irene ouch enthousiast vastelaovendjveerster en ‘n vaste bezeukster van meinig activiteit.
Uutreiking óngerschei-jing
Met recht és Irene Kunnen-Weerts e ‘Kammeräödje’ van De Rogstaekers te neume. De uutreiking van dieës óngerschei-jing hieët plaatsgevônge tiêdes de Boonte Aovendj van donderdig 18 jannewarie in ‘t Munttheater in Wieërt. Heejbeej kriêg ook 't enthousiaste publiek inne zaal nog 's te huuëre, woeërum zjuust Irene dieës Orde verdeendj hieët.
Det gebuuërde in 't beejzeen van 'n tieëntâl persoeëne, di-j dieës Orde al ieërder hebbe moge ontvânge en met hun aanwieëzigheid Irene de ieër verschafdje, woeë het recht op hieët.
