Ronald en Carien hebbe ‘t Online Lidjesfestival van de Rogstaekers gewonne en daomej és ‘Neet oet te legke’ ‘t Wieërter Vastelaovendjlidje van 2024. De tekst és geschrieëve doeër Job van Hoof en Robert Janssen, de meziek doeër Job van Hoof en ‘t arrangemênt és van Ronald Moonen.
Online lidjesfestival
De nowwe Vastlaovendjschlager woeërt doeër ’t Wieërter pebliek gekoeëze tiêdes ‘ne wédstriêd, woeëbeej gestumdj kos waere via de spiksplîntjernowwe app ‘Vastelaovendj inne Stad’. Naodet ‘t Wieërter Vastelaovendj Lidjesfestival (WVLF) geine doeërgânk kos vînge, leêk ’t d’r effe op det de traditie van ‘t ‘Vastelaovendjlidje van ’t jaor’ doeërbroeëke zoeëj waere. In good oeëverlégk met ‘t WVLF en de betrokke artieste hebbe de Rogstaekers ‘n online verkeêzing uutgeschrieëve. Van 2 t/m 5 jannewarie brachte hóngerte vastelaovendjveerders eur stum uut.
Vastelaovendjlidje 2024
De Rogstaekers bedânke alle daelnemers van ‘t Online Lidjesfestival. Naeve Ronald en Carien hebbe Stefan Wolter, De Köpkes en Laurens Vossen gestrieëje um dieës ieër. De kaomendje waeke zâl ‘t nowwe lidje dék in Wieërt te huuëre zeen. Traditiegetraw zâl ‘t nowwe Wieërter Vastelaovendjlidje óngerdael zeen van de kaomendje Boonte Aovendje en de Boonte Femiêliemiddige. Dieës vuuërstéllinge zeen van 12 t/m 20 jannewarie te zeen in ‘t Munttheater, woeë ouch de kaarte te koup zeen.
App Vastelaovendj inne Stad
Tiêdes de lidjesverkeêzing és gebroêk gemaaktj van de nowwe app ‘Vastelaovendj inne Stad’. Doeër dieëze app hieët ‘t pebliek alle benoeëdigdje informatie oeëver de kaomendje vastelaovendj binne hândbereik. Gae vingtj heej de complieëte programma’s, ‘t optochtprogramma en informatie oeëver activiteite, di-j plaatsvînge in de kefees inne Wieërter binnestad. Doeër pushnotificaties kujjae oppe huuëgdje waere gehaoje van alle activiteite. De app és gratis te downloade inne Google Play Store en de Appstore van Apple ónger de naam ‘Vastelaovendj inne stad’ of via onelink.to/rogstaekers. (Mieër info oeëver de app op dieës website).
De volledige uutslaag
D'r zeen in di-j veer daag 363 stumme uutgebrachtj. De verdaeling heejvan és as volgtj:
1. Ronald en Carien - Neet oet te legke: 115
2. De Köpkes - Mân met de Hamer: 103
3. Stefan Wolter - Zaate Hermeni-j in miene Kop: 91
4. Laurens Vossen - Vae höffe ut glaas: 54
Couplet 1:
Wi-j keumtj ‘t det eder jaor bliêktj, det vae fieëstendj verdwale
En völ mieër as meugelik liêktj, oet d’n daag kinne hale
Vae zeen aan dees lachendje minse
vastelaovendj guftj os kieër op kieër, nog mieër dan vae wînse.
Refrein:
‘t És neet oet te légke, mét weurd neet te zegke
Waat vastelaovendj beteîkentj vör os
In e bieëldj neet te vânge, wi-j völ vae verlânge
Waat maaktj vastelaovendj toch allemaol los
Want det geveul det vae Limburgers kinne
És neet te beschriêve, det veuldje van binne....
‘t És neet oet te légke, mét weurd neet te zégke,
waat vastelaovendj beteîkentj vör os.
Couplet 2:
Wi-j kân ‘t det vae eîn vör eîn, de zjuuste snaor rake.
En op ‘t toppûnt van gekdje mét eîn, ‘t nog boonter make.
Dees leefdje um same te viere,
di-j greutj en di-j bleutj in oos hert, det véltj neet te lieëre!
Brök:
Woeë vae mét zeen groeët gebrachtj, kriegse neet oetgelagdj,
Mer minse det és um ’t aeve,
Vastelaovend blieftj voeërtbestaon, zal noeëts verlore gaon,
zoeëlang vae det Limburgs geveul mer door bliêve gaeve!
